ប្រទេសរ៉្វាន់ដា នៅថ្ងៃពុធ (ទី១០ ខែកញ្ញា) នេះ បានចាត់ទុកថា ជាយុទ្ធនាការ «ដ៏ល្ងង់ខ្លៅ» របស់សាធារណរដ្ឋប្រជាធិបតេយ្យកុងហ្គោ ដែលចង់ឲ្យអង្គការសហប្រជាជាតិ (UN) ទទួលស្គាល់ថា មាន «អំពើប្រល័យពូជសាសន៍» ប្រឆាំងនឹងប្រជាជនរបស់ខ្លួន នៅភាគខាងកើតរបស់ប្រទេស។

កាលពីដើមឆ្នាំនេះ ក្រុមប្រដាប់អាវុធ M23 ដែលគាំទ្រដោយរ៉្វាន់ដា បានវាយលុកយ៉ាងលឿនរហ័ស នៅតំបន់ភាគខាងកើតកុងហ្គោ ដោយបានដណ្តើមកាន់កាប់តំបន់យ៉ាងច្រើនសន្ធឹកសន្ធាប់នៃដែនដីសម្បូរដោយធនធានរ៉ែ ដែលត្រូវបានញាំញីដោយអំពើហិង្សាបង្ហូរឈាមអស់រយៈពេលជាង ៣ទសវត្សរ៍។

ការវាយលុកនេះ បានឃើញាថា យុទ្ធជនរបស់ក្រុមឧទ្ទាម M23 ដណ្តើមបានទីក្រុងសំខាន់ៗ ដោយបានសម្លាប់មនុស្ស និងនាំឲ្យមានអ្នកភៀសខ្លួនរាប់ពាន់នាក់ ដែល UN ចាត់ទុកថា ជាវិបត្តិមនុស្សធម៌។

ទីក្រុង Kigali បដិសេធថា ខ្លួនមិនបានផ្តល់ឲ្យក្រុម M23 នូវជំនួយគាំទ្រផ្នែកយោធានោះឡើយ ទោះបីជាការគាំទ្ររបស់ខ្លួនត្រូវបានចងក្រងយ៉ាងទូលំទូលាយដោយអ្នកជំនាញរបស់ UN និងក្រុមសិទ្ធិមនុស្សអន្តរជាតិក៏ដោយ។ រ៉្វាន់ដាលើកហេតុផលថា ខ្លួនប្រឈមនឹងការគំរាមកំហែងដោយសារវត្តមាននៅក្នុងដែនដីកុងហ្គោភាគខាងកើតនៃក្រុមឧទ្ទាមដែលបង្កើតឡើងដោយមេដឹកនាំជនជាតិភាគតិច Hutu ដែលមានជាប់ពាក់ព័ន្ធនឹងអំពើប្រល័យពូជសាសន៍ នៅរ៉្វាន់ដា កាលពីឆ្នាំ១៩៩៤។

កាលពីថ្ងៃអង្គារ អំឡុងសម័យប្រជុំក្រុមប្រឹក្សាសិទ្ធិមនុស្ស UN នៅទីក្រុងហ្សឺណែវ ប្រទេសស្វីស រដ្ឋមន្ត្រីសិទ្ធិមនុស្សរបស់កុងហ្គោ លោក Samuel Mbemba បានប្រាប់អ្នកសារព័ត៌មានថា ប្រទេសរបស់លោកបានបើកយុទ្ធនាការមួយ ដើម្បីឲ្យ «ពិភពលោកឈប់នៅស្ងៀមស្ងាត់» ដោយជំរុញឲ្យមានការទទួលស្គាល់ «អំពើប្រល័យពូជសាសន៍»។

យ៉ាងណាក្ដី រ៉្វាន់ដា ជាកន្លែងដែលមនុស្សប្រហែល ៨០០.០០០នាក់ ដោយភាគច្រើនជាជនជាតិភាគតិច Tutsi និងជនជាតិ Hutu ក្នុងកម្រិតមធ្យម ត្រូវបានសម្លាប់ អំឡុងអំពើប្រល័យពូជសាសន៍ឆ្នាំ១៩៩៤ បានឲ្យឈ្មោះយុទ្ធនាការនេះថា ជា «សំណើដ៏ល្ងង់ខ្លៅ»។

របាយការណ៍របស់ UN ដែលបានចេញផ្សាយកាលពីសប្តាហ៍មុន បានឲ្យដឹងថា ភាគីទាំងអស់ នៅក្នុងអំពើហិង្សាចុងក្រោយបង្អស់ នៅភាគខាងកើតកុងហ្គោ បានប្រព្រឹត្តអំពើរំលោភសិទ្ធិយ៉ាងធ្ងន់ធ្ងរ នៅក្នុងតំបន់នេះ៕