ប្រជាជនប៉ាឡេស្ទីនបានប្រមូលផ្តុំគ្នាកាលពីថ្ងៃពុធ១០កញ្ញាសប្ដាហ៍នេះ នៅកន្លែងនៃការវាយប្រហាររបស់អ៊ីស្រាអែលលើអគារលំនៅដ្ឋាន ដែលជាផ្ទះសម្បែងរបស់ប្រជាជនរត់ភៀសខ្លួនពីសង្គ្រាម។ 

ក្រុមគ្រូពេទ្យបាននិយាយថា ជនជាតិប៉ាឡេស្ទីនពីរនាក់បានស្លាប់ និងផ្សេងទៀតបានរងរបួសនៅពេលដែលការវាយប្រហារបានចំអគារខ្ពស់មួយនៅភាគខាងលិចទីក្រុង ហ្កាហ្សា ដោយក្រុមគ្រូពេទ្យបានបន្ថែមថា អ្នករងរបួសគឺក្នុងចំណោមប្រជាជនដែលរស់នៅក្បែរអគារ ១២ ជាន់។

ប្រជាពលរដ្ឋរាប់សិបគ្រួសារបានភៀសខ្លួនម្ដងហើយម្ដងទៀត ដោយសារការបំផ្លិចបំផ្លាញអគារ ដែលបានបំផ្លាញជំរំតង់នៅតំបន់ជុំវិញផងដែរ។   

អ៊ីស្រាអែលបានចេញការព្រមានដល់ពលរដ្ឋប៉ាឡេស្ទីនឱ្យចាកចេញពីទីក្រុងហ្កាហ្សា ជាតំបន់ធ្លាប់មានប្រជាជនប្រហែលមួយលាននាក់រស់នៅ ខណៈព្យាយាមបំផ្លាញអ្វីដែលនៅសេសសល់របស់ក្រុមហាម៉ាស ដែលត្រូវបានកម្ទេចដោយយោធាអ៊ីស្រាអែលតាំងពីខែតុលាឆ្នាំ ២០២៣ មក។

ការបញ្ជាជម្លៀសនេះបានធ្វើឱ្យមានការភ័យស្លន់ស្លោ និងភាពច្របូកច្របល់ក្នុងចំណោមអ្នកស្រុកក្នុងក្រុងហ្កាហ្សា។ អ្នកខ្លះបាននិយាយថា ពួកគេនឹងគ្មានជម្រើសអ្វីក្រៅពីចាកចេញទៅកាន់ភាគខាងត្បូងនោះទេ ខណៈភាគច្រើននៃអ្នកផ្សេងទៀតបាននិយាយថាពួកគេនឹងបន្តស្នាក់នៅ ព្រោះគ្មានកន្លែងផ្សេងទៀតមានសុវត្ថិភាពឡើយ៕