ហ្វូងបាតុករទូទាំងប្រទេសបារាំង បានសម្រុកតវ៉ាយ៉ាងតានតឹង រាំងខ្ទប់ផ្លូវហាយវេ ដុតរបាំងការពារ និងប៉ះទង្គិចរុញច្រានគ្នាជាបន្តបន្ទាប់ជាមួយនគរបាល កាលពីថ្ងៃពុធ (១០ កញ្ញា) ក្នុងការបង្ហាញកំហឹងប្រឆាំងនឹងលោកប្រធានាធិបតី Emmanuel Macron ដែលគ្រោងកាត់បន្ថយការចំណាយជាតិ។

អាជ្ញាធរបានដាក់ពង្រាយបុគ្គលិកសន្តិសុខជាង ៨ម៉ឺននាក់ ទូទាំងប្រទេស ដាក់របាំងសន្តិសុខ និងបាញ់ទឹកបំបែកក្រុមបាតុករ ខណៈភាពតានតឹងបានផ្ទុះឡើងនៅកន្លែងជាច្រើន។ នៅទីក្រុងប៉ារីស នគរបាលកុបកម្មបានប្រើឧស្ម័នបង្ហូរទឹកភ្នែក ដើម្បីបំបែកហ្វូងអ្នកតវ៉ា ហើយមនុស្សជិត ២០០នាក់ ត្រូវបានចាប់ខ្លួនក្នុងរដ្ឋធានី។ ជាមួយគ្នានេះ បាតុករជាង ៣០០នាក់ផ្សេងទៀត ត្រូវចាប់ខ្លួនទូទាំងប្រទេស ទោះបីជាការប្រមូលផ្តុំគ្នាតវ៉ាភាគច្រើន បែបសន្តិភាពក៏ដោយ។

ចលនាតវ៉ា ដែលគេឱ្យឈ្មោះថា "រាំងខ្ទប់គ្រប់យ៉ាង" (Block Everything) នោះ — សំដៅដល់ការមិនសប្បាយចិត្តដ៏រីករាលដាលលើប្រព័ន្ធផ្សព្វផ្សាយសង្គម — បានផ្ទុះឡើងដំបូងនៅតាមអ៊ីនធឺណិតក្នុងខែឧសភា ក្នុងចំណោមក្រុមស្តាំនិយម ប៉ុន្តែក៏រីករាលដាលដល់ក្រុមឆ្វេងជ្រុលនិយម និងស្តាំជ្រុលនិយម ចាប់តាំងពីពេលនោះមក។ អ្នកតវ៉ានិយាយថា ពួកគេខឹងសម្បារនឹងគម្រោងកាត់ថវិកាជាតិ និងមិនពេញចិត្តចំពោះអ្នកនយោបាយបារាំង។

មនុស្សជិត ២០ម៉ឺននាក់ទូទាំងប្រទេសបារាំង បានចូលរួមក្នុងចលនាតវ៉ានេះ នៅក្នុងអ្វីដែលរដ្ឋមន្ត្រីមហាផ្ទៃ លោក ប្រុយណូ រ៉េតៃឡូ (Bruno Retailleau) បានពិពណ៌នាថាជា "ទ្រង់ទ្រាយធំ" ហើយបានព្រមានថា "អ្នកដែលចង់រាំងខ្ទប់ប្រទេស បានបរាជ័យមិនអាចធ្វើដូច្នេះបានឡើយ"។

ចលាចលនេះបានបន្ថែមបន្ទុកនយោបាយកាន់តែធ្ងន់ នៅថ្ងៃតែមួយដែលអ្នកនយោបាយអភិរក្សនិយម សេបាទ្យាន លេក័រនុយ (Sebastien Lecornu) បានចូលកាន់តំណែងជានាយករដ្ឋមន្ត្រីថ្មីរបស់លោក Macron បន្ទាប់ពីអ្នកកាន់តំណែងពីមុនត្រូវបានសភាបណ្តេញចេញ ដោយសារផែនការដែលមិនពេញនិយមរបស់លោកនៃការកាត់បន្ថយថវិកាជាតិយ៉ាងច្រើន៕