នាយករដ្ឋមន្ត្រីប៉ូឡូញ លោក Donald Tusk បាននិយាយកាលពីថ្ងៃពុធ (១០ កញ្ញា) ថា ប្រទេសប៉ូឡូញ បានខិតទៅជិតជម្លោះបើកចំហបំផុត ចាប់តាំងពីសង្គ្រាមលោកលើកទីពីរមក បន្ទាប់ពីរដ្ឋសមាជិកណាតូមួយនេះ បានបាញ់ទម្លាក់យានដ្រូនរបស់រុស្ស៊ី ដែលហោះនៅលើទឹកដីរបស់ខ្លួន។

លោក Tusk បាននិយាយថា ប៉ូឡូញ បានស្នើឱ្យអង្គការណាតូ បើកការពិគ្រោះយោបល់ក្រោមមាត្រាទី៤ នៃសន្ធិសញ្ញារបស់ខ្លួន ដែលចែងថា សមាជិកនៃសម្ព័ន្ធយោធាលោកខាងលិចនេះ នឹងបើកកិច្ចពិភាក្សាជាមួយគ្នា នៅពេលណាក៏ដោយដែលសមាជិកណាម្នាក់គិតថា ទឹកដី ឯករាជ្យភាពនយោបាយ ឬសន្តិសុខរបស់ពួកគេ ត្រូវបានគំរាមកំហែង។

លោក Tusk បានប្រាប់សភាថា មានការទន្រ្ទានចំនួន ១៩លើក ចូលទៅក្នុងដែនអាកាសប៉ូឡូញ ក្នុងពេលពេញមួយយប់ថ្ងៃដដែលនោះ។ ការលុកលុយនេះបានបង្កើនភាពតានតឹងដែលកំពុងតែក្ដៅគគុករួចទៅហើយ បន្ទាប់ពីឧប្បត្តិហេតុយានដ្រូនបែបនេះកាលពីមុន។ លោក Tusk និយាយថា ការបាញ់ទម្លាក់ដ្រូន ៣គ្រឿង ត្រូវបានបញ្ជាក់ ហើយក៏ទំនងជាមានការបាញ់ទម្លាក់គ្រឿងទី៤ ផងដែរ។

អ្នកនាំពាក្យក្រសួងមហាផ្ទៃប៉ូឡូញ លោកស្រី Karolina Galecka និយាយថា ប៉ូឡូញបានតាមដានឃើញដ្រូន ៧គ្រឿង និងកម្ទេចកម្ទីពីមីស៊ីលមួយគ្រាប់។ អភិបាលក្រុងក្នុងតំបន់បានប្រាប់ទូរទស្សន៍រដ្ឋ TVP Info ថា យានដ្រូន ឬវត្ថុស្រដៀងគ្នានេះ បានវាយប្រហារអគារលំនៅដ្ឋានមួយកន្លែងនៅតំបន់ Wyryki ភាគខាងកើតប៉ូឡូញ ប៉ុន្តែពុំមាននរណាម្នាក់រងរបួសនោះទេ។

វិមានក្រឹមឡាំងកាលពីថ្ងៃពុធ បានបដិសេធមិនធ្វើអត្ថាធិប្បាយលើសេចក្តីថ្លែងការណ៍របស់ប៉ូឡូញ ដែលថាខ្លួនបាញ់ទម្លាក់ដ្រូនរបស់រុស្ស៊ី ក្នុងដែនអាកាសប៉ូឡូញនោះទេ ដោយនិយាយថា នេះជាបញ្ហារបស់ក្រសួងការពារជាតិ៕