មន្រ្តីនគរបាលអាមេរិក កំពុងតែតាមប្រម៉ាញ់ជនដៃដល់ បន្ទាប់ពីលោក Charlie Kirk សកម្មជនស្តាំនិយម និងជាអ្នកអត្ថាធិប្បាយនយោបាយមួយរូបដ៏ល្បីល្បាញ ហើយក៏ជាមនុស្សជំនិតដ៏មានឥទ្ធិពលរបស់លោកប្រធានាធិបតី Donald Trump ត្រូវបានបាញ់សម្លាប់ចំកញ្ចឹងក កាលពីថ្ងៃពុធ (១០ កញ្ញា) អំឡុងព្រឹត្តិការណ៍មួយនៅសាកលវិទ្យាល័យរដ្ឋ Utah ក្នុងអ្វីដែលអភិបាលរដ្ឋពណ៌នាថាជា «ការធ្វើឃាតនយោបាយ»។

អាជ្ញាធរមិនទាន់កំណត់អត្តសញ្ញាណជនដៃដល់ជាសាធារណៈនៅឡើយទេគិតត្រឹមល្ងាចថ្ងៃពុធ (ពេលវេលាអាមេរិក) រយៈពេលជិត ៦ម៉ោងក្រោយការបាញ់ប្រហារ។ នាយកអង្គភាព FBI លោក Kash Patel និយាយថា "បុគ្គលសង្ស័យ" ដែលមិនបញ្ចេញឈ្មោះម្នាក់ ត្រូវបានឃុំខ្លួនដើម្បីសាកសួរ ប៉ុន្តែក្រោយមកត្រូវដោះលែងវិញ ខណៈការស៊ើបអង្កេតកំពុងបន្ត។

អភិបាលរដ្ឋ Utah លោក Spencer Cox បាននិយាយថា នគរបាលកំពុងសាកសួរ "បុគ្គលពាក់ព័ន្ធ" ដោយមិនផ្តល់ព័ត៌មានលម្អិតបន្ថែមឡើយ។ ក្នុងសន្និសីទសារព័ត៌មានដដែលនេះ ស្នងការនៃនាយកដ្ឋានសុវត្ថិភាពសាធារណៈរដ្ឋ Utah និយាយថា ខ្មាន់កាំភ្លើងនៅតែ "មិនទាន់ចាប់ខ្លួនបាននៅឡើយ"។

ឃ្លីបវីដេអូនៃការបាញ់សម្លាប់ ដែលត្រូវចែកចាយតាមអ៊ីនធឺណិត បានបង្ហាញឱ្យឃើញ លោក Kirk វ័យ ៣១ឆ្នាំ កំពុងថ្លែងទៅហ្វូងមនុស្សនៅក្រៅសាកលវិទ្យាល័យ Utah Valley ក្នុងទីក្រុង Orem រដ្ឋ Utah ប្រហែលម៉ោងក្នុងស្រុក ១២:២០នាទីថ្ងៃត្រង់ នៅពេលស្នូរបាញ់កាំភ្លើងបន្លឺឡើង។ លោក Kirk បានដាក់ដៃលើកញ្ចឹងក ហើយធ្លាក់ពីលើកៅអី ខណៈអ្នកចូលរួមនាំគ្នារត់ចេញយ៉ាងចលាចល។ ក្នុងឃ្លីបវីដេអូមួយទៀត គេឃើញមានឈាមហូរចេញពីក របស់លោក Kirk ភ្លាមៗបន្ទាប់ពីការបាញ់ប្រហារ។

អាជ្ញាធរនិយាយថា ជនសង្ស័យទំនងជាបាញ់ចេញពីដំបូលផ្ទះមួយនៅចម្ងាយឆ្ងាយគួរសម ស្របពេលហ្វូងមនុស្សប្រហែល ៣.០០០នាក់ ប្រមូលផ្តុំគ្នាក្នុងព្រឹត្តិការណ៍នេះ។ លោក Trump បានសម្ដែងការសោកស្ដាយ និងទុក្ខសោក ដោយប្ដេជ្ញាតាមចាប់ជនដៃដល់ ហើយបញ្ជាឱ្យទង់ជាតិអាមេរិកទាំងអស់ ត្រូវបង្ហូតត្រឹមពាក់កណ្តាលដង រហូតដល់ថ្ងៃអាទិត្យសប្ដាហ៍នេះ ដើម្បីជាការគោរពដល់លោក Kirk៕