អ្នកកាន់ទុក្ខបានប្រមូលផ្តុំគ្នានៅវិមាន Capitol របស់រដ្ឋ Utah នៅយប់ថ្ងៃពុធ ១០ កញ្ញា ដើម្បីប្រារព្ធ ពិធីគោរពវិញ្ញាណក្ខន្ធ ចំពោះ លោក Charlie Kirk បន្ទាប់ពីសកម្មជនស្តាំនិយម និងជាវាគ្មិនរបស់សហរដ្ឋអាមេរិករូបនេះ ត្រូវបានបាញ់សម្លាប់កាលពីថ្ងៃពុធនៅឯព្រឹត្តិការណ៍មួយនៅសាកលវិទ្យាល័យ Utah Valley ។

គេបានមើលឃើញមានការបង្ហាញផ្ទាំងរូបភាពមួយ សរសេរថា យើងស្រឡាញ់អ្នក Charlie Kirk ខណៈក្រុមអ្នកគាំទ្រធ្វើសុន្ទរកថានិងច្រៀងសរសើរសម្ព័ន្ធមិត្តដ៏មានឥទ្ធិពលរបស់ប្រធានាធិបតី Donald Trump ។លោក Trump បានបង្គាប់ឲ្យបង្ហូតទង់ជាតិពាក់កណ្ដាលដងនៅសហរដ្ឋអាមេរិកដើម្បីបង្ហាញការគោរព។

ក្រុមអាជ្ញាធរពុំទាន់កំណត់អត្តសញ្ញាណជនសង្ស័យជាសាធារណៈនៅឡើយទេ ប្រហែល៦ម៉ោងក្រោយការបាញ់ប្រហារ។ ប្រព័ន្ធផ្សព្វផ្សាយរបស់សហរដ្ឋអាមេរិកបានរាយការណ៍ដោយដកស្រង់ប្រភពពីស្ថាប័នអនុវត្តច្បាប់ថា គ្មានជនសង្ស័យណាម្នាក់ត្រូវបានឃុំខ្លួននោះទេ។ នាយកភ្នាក់ងារ FBI លោក Kash Patel បាននិយាយថា មនុស្សមិនបញ្ចេញឈ្មោះម្នាក់ត្រូវបានឃុំខ្លួន ដើម្បីសាកសួរ បន្ទាប់មកត្រូវបានដោះលែង។

វីដេអូឃ្លីបទូរស័ព្ទដៃនៃការសម្លាប់ដែលត្រូវបានបង្ហោះតាមអ៊ីនធឺណែតបានបង្ហាញពីលោក Kirk ថ្លែងទៅកាន់ហ្វូងមនុស្សនៅខាងក្រៅសាកលវិទ្យាល័យ Utah Valley ក្នុងទីក្រុង Orem រដ្ឋ Utah វេលាម៉ោងប្រហែល ១២ និង២០ នាទីថ្ងៃត្រង់ នៅពេលការបាញ់ប្រហារបានផ្ទុះឡើង។ លោក Kirk បានលើកដៃកាន់ករបស់លោក ខណៈលោកបានធ្លាក់ពីកៅអី ហើយមនុស្សចោមរោម។ នៅក្នុងឃ្លីបមួយទៀត គេបានមើលឃើញឈាមហូរចេញពីករបស់លោក Kirk ភ្លាមៗបន្ទាប់ពីការបាញ់៕