កាលឆ្នាំ២០២១ បណ្ដានាយកប្រតិបត្តិក្រុមហ៊ុន Audi ដ៏ល្បីរបស់អាល្លឺម៉ង់ បានបង្ហាញភាពភ្ញាក់ផ្អើល នៅពេលឃើញរថយន្តអគ្គិសនីរយៈចម្ងាយឆ្ងាយ Zeekr 001 ដ៏ទំនើបរបស់ក្រុមហ៊ុនចិន Geely ជាមួយនឹងសោភ័ណភាពរចនាបថឌីហ្សាញបែបអឺរ៉ុប ជាលើកដំបូងក្នុងឆ្នាំនោះ ដែលនាំឱ្យស្ថាប័នរថយន្តអាល្លឺម៉ង់ដ៏ប្រណិតមួយនេះ ភ្ញាក់ខ្លួនព្រើតទៅនឹងសារដាស់តឿនដ៏សំខាន់មួយថា ប្រសិនបើក្រុមហ៊ុនរថយន្តសកលចង់ប្រកួតប្រជែងជាមួយចិន នោះពួកគេត្រូវការជាចាំបាច់នូវបច្ចេកវិទ្យាទំនើបរបស់ចិន។

នេះបង្ហាញឱ្យឃើញថា បច្ចេកវិទ្យា EV ចិន កំពុងតែផ្លាស់ប្តូរបែបបថរថយន្តពិភពលោក ខណៈក្រុមហ៊ុនសកល ស្វះស្វែងរកបច្ចេកវិទ្យាចិន ដើម្បីជម្នះឧបសគ្គនៃការអភិវឌ្ឍ EV។ ដើម្បីបង្កើនថាមពល EV របស់ខ្លួនសម្រាប់អ្នកប្រើប្រាស់ចិន ក្រុមហ៊ុន Audi បានផលិតរថយន្តម៉ាក AUDI E5 Sportback ក្នុងពេលត្រឹមតែ ១៨ខែ ដោយប្រើបច្ចេកវិទ្យាផ្តល់ដោយដៃគូចិន SAIC រួមទាំងថ្ម មុខងារអគ្គិសនី កម្មវិធីព័ត៌មានកម្សាន្ត និងប្រព័ន្ធជំនួយការបើកបរកម្រិតខ្ពស់។

Audi នឹងចាប់ផ្តើមចែកចាយរថយន្ត EV នេះក្នុងតម្លៃ ៣៣.០០០ដុល្លារ ដល់អតិថិជនចិន ក្នុងខែកញ្ញានេះ ហើយគូប្រជែងសកលរបស់ខ្លួនក៏កំពុងចង់ប្រើប្រាស់បច្ចេកវិទ្យាចិន ដើម្បីបញ្ចេញម៉ូដែលថ្មីៗយ៉ាងឆាប់រហ័សផងដែរ។ ក្រុមហ៊ុនជប៉ុន Toyota និង Volkswagen របស់អាល្លឺម៉ង់ មានផែនការអភិវឌ្ឍរួមគ្នាសម្រាប់ម៉ូដែលផ្ដោតលើចិន ជាមួយនឹងបច្ចេកវិទ្យាពីដៃគូចិន GAC និង Xpeng រៀងគ្នា។

ប្រភពនិយាយថា ក្រុមហ៊ុនបារាំង Renault និង Ford របស់អាមេរិក ក៏ចង់ឈានទៅមុខមួយជំហានបន្ថែមទៀត និងអភិវឌ្ឍម៉ូដែលសកលផ្អែកលើថ្នាល EV របស់ចិនផងដែរ ប៉ុន្តែមិនទាន់មានការបញ្ជាក់នៅឡើយ។ កិច្ចព្រមព្រៀងផ្តល់អាជ្ញាបណ្ណបច្ចេកវិទ្យាបែបនេះ អាចបង្កើតលំហូរប្រាក់ចំណូលតិចតួច ប៉ុន្តែកំពុងកើនឡើងមិនឈប់សម្រាប់អ្នកផលិតរថយន្ត EV របស់ចិន៕