អ្នកការទូតរុស្ស៊ីជាន់ខ្ពស់មួយរូបនៅប្រទេសប៉ូឡូញ បានចេញមកបដិសេធកាលពីថ្ងៃ (១០ កញ្ញា) ថា ទីក្រុងមូស្គូ មិនបាននៅពីក្រោយការទន្រ្ទានយានដ្រូនចូលក្នុងដែនអាកាសប៉ូឡូញនោះទេ ដោយអះអាងថា ឧបករណ៍ទាំងនោះបានមកពីទិសដៅអ៊ុយក្រែនប៉ុណ្ណោះ ខណៈសម្ព័ន្ធយោធាណាតូ និងសហភាពអឺរ៉ុប បានប្រតិកម្មយ៉ាងខឹងសម្បារចំពោះរឿងនេះ។

លោក Andrey Ordash ភារធារីបណ្ដោះអាសន្នរបស់រុស្ស៊ីនៅប៉ូឡូញ បានចោទប្រកាន់រដ្ឋាភិបាលប៉ូឡូញថា តែងតែបន្ទោសទីក្រុងមូស្គូ នៅពេលណាដែលមានរឿង "មិនធម្មតា" កើតឡើង។ កម្ទេចកម្ទីពីដ្រូន ១០គ្រឿង និងផ្នែកខ្លះនៃមីស៊ីលមួយគ្រាប់ ត្រូវពិនិត្យឃើញនៅតំបន់ផ្សេងៗគ្នានៃប្រទេសប៉ូឡូញ បន្ទាប់ពីយន្តហោះកងកម្លាំងអាកាសបានស្ទាក់ចាប់យុទ្ធោបករណ៍ទាំងនោះ ដែលជាការរំលោភបំពានដ៏ធំលើដែនអាកាសប៉ូឡូញនៅព្រឹកព្រលឹមថ្ងៃពុធ។

បេសកជនរុស្ស៊ីរូបនោះបាននិយាយថា គ្មានហេតុផលណាដែលអាចជឿបានឡើយថា ដ្រូនដែលពាក់ព័ន្ធក្នុងឧប្បត្តិហេតុពេញមួយយប់នោះបានមកពីរុស្ស៊ី — ដែលផ្ទុយទៅនឹងការអះអាងរបស់នាយករដ្ឋមន្ត្រីប៉ូឡូញ លោក Donald Tusk ដែលថា ទាំងនោះជាដ្រូនរុស្ស៊ី ដែលបានហោះចូលផ្ទាល់ពីប្រទេសសម្ព័ន្ធមិត្តបេឡារុស។

មេដឹកនាំអង្គការណាតូ និងប្លុកអឺរ៉ុបជាច្រើនរូបបានរិះគន់យ៉ាងខ្លាំងចំពោះការបំពាននេះថា "មិនអាចទទួលយកបានឡើយ" ហើយលោកស្រី Kaja Kallas អ្នកតំណាងកិច្ចការបរទេសជាន់ខ្ពស់របស់សហភាពអឺរ៉ុប បាននិយាយថា នេះជា "ចេតនា មិនមែនដោយចៃដន្យទេ"។ យ៉ាងណាមិញ ក្រសួងការពារជាតិរុស្ស៊ី និយាយថា ដ្រូនរបស់ខ្លួនបានរវាយប្រហារដ៏ធំមួយលើមូលដ្ឋានយោធាភាគខាងលិចអ៊ុយក្រែន ប៉ុន្តែមិនមានគម្រោងវាយប្រហារគោលដៅណាមួយនៅប៉ូឡូញនោះឡើយ៕