ប្រទេសហ្គាណា បានយល់ព្រមទទួលយកជនអន្តោប្រវេសន៍អាហ្វ្រិកខាងលិច ដែលត្រូវបាននិរទេសចេញពីសហរដ្ឋអាមេរិក ហើយមានមនុស្ស ១៤នាក់ ទៅដល់ប្រទេសនេះរួចហើយ នេះបើតាមការលើកឡើងរបស់ប្រធានាធិបតីហ្គាណា លោក John Dramani Mahama កាលពីល្ងាចថ្ងៃពុធ (១០ កញ្ញា)។

ប្រធានាធិបតីអាមេរិក លោក Donald Trump បានចាត់វិធានការយ៉ាងតឹងរ៉ឹងលើបញ្ហាអន្តោប្រវេសន៍ ដោយមានបំណងនិរទេសជនអន្តោប្រវេសន៍រាប់លាននាក់ ដែលកំពុងរស់នៅសហរដ្ឋអាមេរិកដោយខុសច្បាប់ និងចង់បញ្ជូនអ្នកទាំងនោះទៅប្រទេសទីបី។

លោក Mahama បាននិយាយក្នុងសន្និសីទសារព័ត៌មានមួយថា ក្រុមអ្នកត្រូវនិរទេស ១៤នាក់ រួមទាំងជនជាតិនីហ្សេរីយ៉ា និងហ្គាំប៊ី បានទៅដល់ហ្គាណារួចទៅហើយ ហើយរដ្ឋាភិបាលបានសម្របសម្រួលឱ្យពួកគេត្រឡប់ទៅប្រទេសកំណើតវិញ។ លោក Mahama មិនបានបញ្ជាក់ពីចំនួនកំណត់អ្នកនិរទេស ដែលហ្គាណានឹងទទួលយកនោះទេ ដោយគ្រាន់តែនិយាយថា ជនជាតិអាហ្វ្រិកខាងលិច "មិនត្រូវការទិដ្ឋាការ" ដើម្បីចូលហ្គាណាស្រាប់ទៅហើយ។

រដ្ឋបាលលោក Trump បានស្នើរដ្ឋាភិបាលអាហ្រ្វិកមួយចំនួន ឱ្យព្រមទទួលយកអ្នកនិរទេស ជាផ្នែកមួយនៃយុទ្ធនាការរបស់ទីក្រុងវ៉ាស៊ីនតោន ក្នុងការរារាំងអន្តោប្រវេសន៍ខុសច្បាប់តាមរយៈការនិរទេស ទៅកាន់អ្វីដែលគេហៅថា "ប្រទេសទីបី" ។ ជនអន្តោប្រវេសន៍បានសម្តែងក្ដីរម្ភចំពោះសុវត្ថិភាពរបស់ពួកគេ ដោយភ័យខ្លាចពីហានិភ័យនៃការនិទេសបែបនេះ៕