យោងតាមប្រភព ដែលបានដឹងព័ត៌មានយ៉ាងច្រើន បានប្រាប់ថា អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) ហាក់ដូចជាបានសម្របខ្លួននឹងជីវិត នៅក្នុងពន្ធនាគា ខណៈដែលរូបលោកត្រូវបានគេឃើញថា កំពុងសម្រាកយ៉ាងលង់លក់ សម្រាប់ដំណេកយប់ទី២ នៅក្នុងមន្ទីរឃុំឃាំង Klong Prem Central Prison ហើយមិនបានរំលងអាហារមួយពេលណាឡើយ។

ប្រភពពីមន្ទីរឃុំឃាំងនៃនាយកដ្ឋានកែប្រែ បានឲ្យដឹងថា ការត្រួតពិនិត្យយ៉ាងដិតដល់ បង្ហាញថា លោក ថាក់ស៊ីន បានសម្រាកយ៉ាងលក់ស្កប់ស្កល់ នៅយប់ទី២ ដោយមិនមានសញ្ញានៃការមានភាពអន្ទះអន្ទែងនៅមិនសុខនោះឡើយ។

ប្រភពបានបន្ថែមថា លោកមិនបានបង្ហាញនូវសញ្ញាមានភាពតានតឹងក្នុងចិត្ត ឬធ្លាក់ទឹកចិត្តនោះទេ ហើយបានសហការជាមួយមន្ត្រីពន្ធនាគារ ដោយប្រព្រឹត្តតាមការណែនាំរបស់ពួកគេ៕