ប្រធានាធិបតីអ៊ីស្រាអែល លោក Isaac Herzog បាននិយាយថា លោកបានជជែកតវ៉ាជាមួយនាយករដ្ឋមន្ត្រីអង់គ្លេស លោក Keir Starmer នៅវិមាន Downing Street កាលពីថ្ងៃពុធ (ទី១០ ខែកញ្ញា) ក្នុងអំឡុងពេលមាននូវកិច្ចប្រជុំ «ដ៏តានតឹង» ដែលគ្របដណ្តប់ការខ្វែងគំនិតគ្នាយ៉ាងខ្លាំង ជុំវិញការបង្ហាញឥរិយាបថនាពេលថ្មីៗនេះ ដោយប្រទេសម្ខាងៗ។

កិច្ចប្រជុំនេះកើតឡើងមួយថ្ងៃបន្ទាប់ពីអ៊ីស្រាអែលបានពង្រីកការវាយប្រហាររបស់ខ្លួន លើក្រុមហាម៉ាសដោយបើកការវាយប្រហារតាមអាកាស ក្នុងគោលបំណងតាមសម្លាប់មេដឹកនាំនយោបាយរបស់ក្រុមនេះ នៅប្រទេសកាតាដែលជាសម្ព័ន្ធមិត្តរបស់អង់គ្លេសនៅតំបន់មជ្ឈិមបូព៌ា ជាអ្វីដែលលោក Starmer បានថ្កោលទោស។

អ៊ីស្រាអែលបានខឹងសម្បា ចំពោះផែនការរបស់ចក្រភពអង់គ្លេស ក្នុងការចូលរួមជាមួយប្រទេសលោកខាងលិចមួយចំនួនទៀត ក្នុងនោះមានរួមទាំងបារាំង និងកាណាដាផងដែរ ក្នុងការទទួលស្គាល់រដ្ឋប៉ាឡេស្ទីននៅចុងខែនេះ ប្រសិនបើអ៊ីស្រាអែលមិនបំពេញលក្ខខណ្ឌនានា រួមទាំងការមានបទឈប់បាញ់ នៅតំបន់ហ្កាហ្សាផងដែរ។

ក្រោយមក នៅក្នុងព្រឹត្តិការណ៍ Chatham House លោក Herzog បាននិយាយថា៖ «អ្វីៗត្រូវបានគេនិយាយថា តឹងតែង និងខ្លាំងក្លា ហើយច្បាស់ណាស់ថា យើងអាចជជែកតវ៉ាបាន ពីព្រោះនៅពេលដែលសម្ព័ន្ធមិត្តជួបគ្នា ពួកគេអាចជជែកតវ៉ាបាន។ ពួកយើងទាំង២ គឺជាប្រទេសប្រជាធិបតេយ្យ»។

លោកប្រធានាធិបតីរូបនេះបានបញ្ជាក់ថា ផែនការរបស់លោក Starmer ក្នុងការទទួលស្គាល់ភាពជារដ្ឋរបស់ប៉ាឡេស្ទីន និងទស្សនៈរបស់លោក ជុំវិញជំនួយមនុស្សធម៌ នៅតំបន់ហ្កាហ្សា គឺជាឫសគល់នៃការខ្វែងគំនិតគ្នា ហើយបានបន្ថែមថា លោកបានអញ្ជើញរដ្ឋាភិបាលអង់គ្លេសឲ្យបំពេញបេសកកម្មស្វែងរកការពិត នៅអ៊ីស្រាអែល។ 

ចំណែកការិយាល័យរបស់លោក Starmer បានឲ្យដឹងថា មេដឹកនាំអង់គ្លេសបានអង្វរសុំឲ្យលោក Herzog ផ្លាស់ប្តូរទិសដៅ ពាក់ព័ន្ធនឹងតំបន់ហ្កាហ្សា ដោយបង្ហាញពីក្ដីបារម្ភយ៉ាងខ្លាំង អំពីវិបត្តិមនុស្សធម៌ និងជំរុញឲ្យអ៊ីស្រាអែលអនុញ្ញាតឲ្យមានជំនួយចូល និងបញ្ឈប់ប្រតិបត្តិការវាយលុក៕