អគ្គលេខាធិការអង្គការសហប្រជាជាតិ (UN) លោក Antonio Guterres បានបង្ហាញពីក្ដីបារម្ភយ៉ាងខ្លាំងកាលពីថ្ងៃពុធ (ទី១០ ខែកញ្ញា) បន្ទាប់ពីយានដ្រូនរបស់រុស្ស៊ីត្រូវបានគេរាយការណ៍ថា បានចូលទៅក្នុងដែនអាកាសប៉ូឡូញពេញមួយយប់ ដោយវាយប្រហារតំបន់លំនៅឋាន និងធ្វើឲ្យកង្វល់មានកាន់តែខ្លាំងឡើងៗ អំពីការកើនឡើងនូវភាពតានតឹងក្នុងតំបន់។

អ្នកនាំពាក្យរបស់លោក Guterres លោក Stephane Dujarric បាននិយាយក្នុងសន្និសីទសារព័ត៌មានមួយថា៖ «ខ្ញុំអាចប្រាប់បានថា អគ្គលេខាធិការកំពុងតាមដានដោយមានការព្រួយបារម្ភយ៉ាងខ្លាំង ចំពោះរបាយការណ៍ ដែលថា យានដ្រូនយោធារុស្ស៊ីបានហោះចូលប្រទេសប៉ូឡូញពេញមួយយប់ ដោយរំលោភលើដែនអាកាសរបស់ប្រទេសប៉ូឡូញ ដែលបណ្តាលឲ្យមានការខូចខាតដល់តំបន់លំនៅឋាន នៅក្នុងប្រទេសប៉ូឡូញ»។

លោក Dujarric បានសង្កត់ធ្ងន់ថា៖ «ឧប្បត្តិហេតុដែលត្រូវបានគេរាយការណ៍ថា បានកើតឡើងស្របពេលមានការវាយប្រហារដោយយានដ្រូន និងមីស៊ីលរបស់រុស្ស៊ីទ្រង់ទ្រាយធំមួយទៀតទៅលើអ៊ុយក្រែន ជាថ្មីម្តងទៀតគូសបញ្ជាក់អំពីផលប៉ះពាល់ក្នុងតំបន់ និងហានិភ័យពិតប្រាកដនៃការពង្រីកជម្លោះដ៏បំផ្លិចបំផ្លាញនេះ»។

លោកបានកត់សម្គាល់ថា៖ «មានតម្រូវការជាបន្ទាន់ ដើម្បីឲ្យមានបទឈប់បាញ់ពេញលេញ ភ្លាមៗ និងគ្មានលក្ខខណ្ឌ និងដើម្បីធានាបានសន្តិភាពដ៏ត្រឹមត្រូវ ទូលំទូលាយ និងប្រកបដោយនិរន្តរភាព នៅអ៊ុយក្រែន ជាអ្វីដែលអាចរក្សាបានពេញលេញនូវអធិបតេយ្យភាព ឯករាជ្យភាព និងបូរណភាពទឹកដីរបស់អ៊ុយក្រែន ស្របតាមធម្មនុញ្ញអង្គការសហប្រជាជាតិ ច្បាប់អន្តរជាតិ និងសេចក្ដីសម្រេចពាក់ព័ន្ធរបស់អង្គការសហប្រជាជាតិ»។

គួរបញ្ជាក់ថា នាយករដ្ឋមន្ត្រីប៉ូឡូញ លោក Donald Tusk បាននិយាយថា ដែនអាកាសរបស់ប្រទេសលោក ត្រូវបានរំលោភបំពានដោយយានដ្រូនរបស់រុស្ស៊ីពេញមួយយប់ ដោយបន្ថែមថា កងកម្លាំងរបស់អង្គការណាតូ និងប៉ូឡូញបានបាញ់ទម្លាក់ជាច្រើនគ្រឿង៕