ក្រសួងការពារជាតិ បាននិយាយកាលពីថ្ងៃពុធថា សាធារណរដ្ឋឆេកនឹងគាំទ្រប្រទេសប៉ូឡូញ ដោយនឹងបញ្ជូនឧទ្ធម្ភាគចក្រដើម្បីការពារប្រទេសនេះពីយានដ្រូនក្នុងរយៈកម្ពស់ទាប។ ក្នុងការឆ្លើយតបទៅនឹង «ការគំរាមកំហែងបច្ចុប្បន្ន»ពីសកម្មភាពយានដ្រូននៅលើទឹកដីប្រទេសប៉ូឡូញ ក្រសួងនិយាយថាបានត្រៀមជាស្រេចក្នុងការបញ្ជូនអង្គភាពឧទ្ធម្ភាគចក្រសម្រាប់ប្រតិបត្តិការពិសេស រួមមានយន្តហោះ Mi-171S ដែលបានកែសម្រួលមានលក្ខណៈពិសេសចំនួនបីគ្រឿង។

ក្រសួងបាននិយាយនៅក្នុងសេចក្តីថ្លែងការណ៍ថា ប្រទេសប៉ូឡូញបានស្នើសុំអង្គភាពនេះបន្ទាប់ពីការសន្ទនាតាមទូរស័ព្ទរវាងរដ្ឋមន្ត្រីការពារជាតិឆេក លោកស្រី Jana Cernochova និងសមភាគីប៉ូឡូញ លោក Wladyslaw Kosiniak-Kamysz ។ ក្រសួងបានបន្ថែមថា ចំនួនទាហាននឹងមិនលើសពី១៥០នាក់ ហើយនឹងត្រូវបានកំណត់ដោយផ្អែកលើស្ថានភាពបច្ចុប្បន្ន និងលទ្ធភាពនៃការគាំទ្រផ្នែកដឹកជញ្ជូន។

នាយករដ្ឋមន្ត្រីឆេក លោក Petr Fiala បាននិយាយនៅលើវេទិកាបណ្តាញផ្សព្វផ្សាយសង្គម X ថា «ឧទ្ធម្ភាគចក្ររបស់យើងអាចជួយការពារដែនអាកាសអឺរ៉ុបក្នុងរយៈពេលពីរឬបីថ្ងៃ»។ 

កងទ័ពអាកាសប៉ូឡូញ បានបាញ់ទម្លាក់យានដ្រូនជាច្រើនគ្រឿងកាលពីថ្ងៃពុធ បន្ទាប់ពីប្រទេសនេះបានរាយការណ៍ថា ដែនអាកាសរបស់ខ្លួនត្រូវបានបំពានដោយ «យានដ្រូនរុស្ស៊ីក្នុងចំនួនដ៏ច្រើន» ដែលមួយចំនួនបានបង្ក «ការគំរាមកំហែងដោយផ្ទាល់»។