នៅថ្ងៃព្រហស្បតិ៍នេះ នាយករដ្ឋមន្រ្តីជប៉ុនលោក Shigeru Ishiba និងសមភាគីព័រទុយហ្គាល់លោក Luis Montenegro បានយល់ព្រមបង្កើនទំនាក់ទំនងរវាងប្រទេសទាំង ២ ដល់ភាពជាដៃគូយុទ្ធសាស្រ្ត ។ 

មេដឹកនាំទាំង ២ ដែលបានជួបគ្នានៅការិយាល័យនាយករដ្ឋមន្រ្តីជប៉ុន ស្ថិតក្នុងទីក្រុងតូក្យូ បានឯកភាពគ្នាផងដែរ ដើម្បីពង្រឹងកិច្ចសហប្រតិបត្តិការជប៉ុន-ព័រទុយហ្គាល់ លើវិស័យជាច្រើន រួមទាំងវិស័យ សេដ្ឋកិច្ច និងសន្តិសុខ ។

លោក Ishiba និងលោក Montenegro បានចែករំលែកការទទួលស្គាល់ថា សន្តិសុខតំបន់យូរ៉ូ-អាត្លង់ទិក និងឥណ្ឌូ-ប៉ាស៊ីហ្វិក មិនអាចបំបែកចេញពីគ្នាបានកាន់តែខ្លាំងឡើង ហើយពួកគេបញ្ជាក់ពីការប្តេជ្ញាចិត្តធ្វើការរួមគ្នា ដើម្បីលើកកម្ពស់តំបន់ឥណ្ឌូ-ប៉ាស៊ីហ្វិកសេរី និងបើកទំលាយ ។

លោក Ishiba និយាយនៅក្នុងសន្និសីទសារព័ត៌មានរួមគ្នាដោយសំដៅលើទំនាក់ទំនងរវាងជប៉ុន និងព័រទុយហ្គាល់ថា ពួកយើងបានចែករំលែការយល់ដឹងថា កិច្ចសហប្រតិបត្តិការជិតស្និតសំខាន់ជាងពេលណាណាទាំងអស់ ។

ដោយឡែក លោក Montenegro បានបង្ហាញគោលបំណងរបស់ព័រទុយហ្គាល់ ក្នុងការជំរុញទំនាក់ទំនងជាមួយជប៉ុនផងដែរ ៕