ប្រទេសចិន នៅថ្ងៃព្រហស្បតិ៍ (ទី១១ ខែកញ្ញា) នេះ បានឲ្យដឹងថា ខ្លួន «ប្រឆាំងយ៉ាងដាច់ណាត់ ចំពោះការបង្ខិតបង្ខំណាមួយ» បន្ទាប់ពីប្រទេសម៉ិកស៊ិកបានស្នើដំឡើងពន្ធ ៥០ភាគរយលើការនាំចូលរថយន្តពីប្រទេសមហាយក្សអាស៊ី។

គំនិតផ្តួចផ្តើម ដែលមាននៅក្នុងសេចក្ដីស្នើច្បាប់ដាក់ជូនទៅសភាដោយរដ្ឋាភិបាលម៉ិកស៊ិក ស្វែងរកការធានាដល់ប្រធានាធិបតីអាមេរិក លោក Donald Trump ដែលបានជំរុញដៃគូពាណិជ្ជកម្មម្តងហើយម្តងទៀតឲ្យបង្កើនកាតព្វកិច្ចពន្ធលើប្រទេសចិន ខណៈពេលដែលក៏កំពុងជំរុញវិស័យឧស្សាហកម្មរបស់ខ្លួនផងដែរ។

សេតវិមានបានឲ្យដឹងថា ក្រុមហ៊ុនផលិតចិន កំពុងបំពានលើកិច្ចព្រមព្រៀងពាណិជ្ជកម្មសេរី រវាងសហរដ្ឋអាមេរិក ម៉ិកស៊ិក និងកាណាដា ដោយបាននិងកំពុងបញ្ជូនទំនិញទៅភាគខាងជើង នៅតាមព្រំដែនម៉ិកស៊ិក ដោយមិនជាប់ពន្ធ។

ប្រសិនបើសេចក្ដីស្នើច្បាប់នេះត្រូវបានអនុម័តនោះ ការនាំចូលរថយន្តធុនស្រាលពីប្រទេសចិន នឹងត្រូវបង់ពន្ធ ៥០ភាគរយ ហើយគ្រឿងបន្លាស់រថយន្ត ចន្លោះពី ១០ ទៅ ៥០ភាគរយ។

អ្នកនាំពាក្យក្រសួងការបរទេសចិន លោក Lin Jian បានប្រាប់សន្និសីទសារព័ត៌មានប្រចាំថ្ងៃថា៖ «ប្រទេសចិនប្រឆាំងយ៉ាងដាច់ណាត់ ចំពោះរាល់ការបង្ខិតបង្ខំដោយប្រទេសដទៃ ក្នុងការដាក់ចេញនូវការរឹតបន្តឹងលើប្រទេសចិន ក្រោមលេសផ្សេងៗ ដែលប៉ះពាល់សិទ្ធិ និងផលប្រយោជន៍ស្របច្បាប់របស់ចិន»។

លោក Lin បានបន្ថែមថា៖ «យើងនឹងការពារផលប្រយោជន៍របស់យើងយ៉ាងម៉ឺងម៉ាត់ ស្របតាមកាលៈទេសៈជាក់ស្តែង។ ប្រទេសចិនយកចិត្តទុកដាក់យ៉ាងខ្លាំង ចំពោះការលើកកម្ពស់ទំនាក់ទំនងចិន-ម៉ិកស៊ិក ហើយសង្ឃឹមថា ម៉ិកស៊ិកនឹងឆ្ពោះទៅមុខក្នុងទិសដៅដូចគ្នាជាមួយប្រទេសចិន»៕