រដ្ឋាភិបាលកណ្តាល-ស្ដាំនិយមដែលមានសំឡេងភាគតិចរបស់ប្រទេសព័រទុយហ្គាល់ បានចាប់ផ្តើមរុះរើច្បាប់ការងារដ៏សំខាន់មួយ ដើម្បីជំរុញការប្រកួតប្រជែង ដោយធ្វើឲ្យមានការបណ្តេញចេញកាន់តែងាយស្រួល និងម៉ោងធ្វើការកាន់តែមានភាពបត់បែន ជាវិធានការមួយដែលត្រូវបានរិះគន់ដោយសហជីព ដោយបាននិយាយថា វាបំពានសិទ្ធិកម្មករ។

កំណែទម្រង់នេះស្វែងរកការកែប្រែមាត្រាមិនតិចជាង ១០០មាត្រានៃច្បាប់ការងារ ដែលព័រទុយហ្គាល់លើកឡើងថា «បានជាប់នៅក្នុងគំរូការងារបែបប្រពៃណី និងផ្ដល់ការលំបាកដល់ការឆ្លើយតបនឹងបញ្ហាប្រឈមនៃយុគសម័យឌីជីថល»។

គោលដៅចម្បងរបស់កំណែទម្រង់នេះ គឺដើម្បីលើកកម្ពស់ផលិតភាពអាជីវកម្ម។ បើយោងតាមរបាយការណ៍របស់ក្រុមប្រឹក្សាផលិតភាពជាតិ បានឲ្យដឹងថា ថ្វីបើមានកំណើនយឺតៗ ក្នុងប៉ុន្មានឆ្នាំថ្មីៗនេះក៏ដោយ ក៏ព័រទុយហ្គាល់នៅតែនៅឆ្ងាយពីក្រោមមធ្យមភាគរបស់សហភាពអឺរ៉ុប ដោយសារភាពទន់ខ្សោយនៃរចនាសម្ព័ន្ធ ដូចជាគុណវឌ្ឍិអប់រំទាបជាដើម។

ដំណើរការកំណែទម្រង់នេះបានចាប់ផ្តើមដោយមានការពិភាក្សាជាមួយសហជីព និងនិយោជក ដែលជាជំហានចាំបាច់មួយ មុនពេលគណៈរដ្ឋមន្ត្រីអនុម័តសេចក្តីព្រាងច្បាប់ចុងក្រោយ។ វានៅតែអាចក្លាយជាច្បាប់ជាធរមាន ទោះបីភាគីពាក់ព័ន្ធ ក្នុងការពិភាក្សា មិនអាចឈានដល់កិច្ចព្រមព្រៀងក៏ដោយ។

កាលពីល្ងាចថ្ងៃពុធ (ទី១០ ខែកញ្ញា) រដ្ឋមន្ត្រីក្រសួងការងារ លោកស្រី Maria do Rosario Ramalho បាននិយាយថា ការចរចាគួរតែមានលក្ខណៈហ្មត់ចត់ ដោយសារវិសាលភាព និងភាពស្មុគស្មាញរបស់គម្រោង ប៉ុន្តែបានបន្ថែមថា រដ្ឋាភិបាលនឹងមិនពង្រីកការកែប្រែនេះដោយមិនមានការកំណត់ច្បាស់លាស់នោះឡើយ។

យ៉ាងណាក្ដី សហជីពការងារសំខាន់ៗចំនួន ២ របស់ព័រទុយហ្គាល់ ប្រឆាំងនឹងកំណែទម្រង់នេះ ដោយលើកឡើងថា ជា «ការគំរាមកំហែងដល់កម្មករ» ហើយមិនបានច្រានចោលការធ្វើកូដកម្មទូទៅនោះឡើយ ប្រសិនបើរដ្ឋាភិបាលបន្តទៅមុខជាមួយផែនការនេះ៕