រដ្ឋមន្ត្រីការបរទេសហូឡង់ បានប្រាប់សភាថា រដ្ឋាភិបាលប្រទេសហូឡង់ គ្រោងនឹងហាមឃាត់ការនាំចូលទំនិញដែលផលិតនៅក្នុងតំបន់តាំងទីលំនៅរបស់ជនជាតិជ្វីហ្វ នៅក្នុងដែនដីប៉ាឡេស្ទីនកាន់កាប់ដោយអ៊ីស្រាអែល ជុំវិញផែនការរបស់អ៊ីស្រាអែល សម្រាប់តំបន់ West Bank និងការវាយលុកយោធារបស់ខ្លួន នៅតំបន់ហ្កាហ្សា។

ហូឡង់បានដាក់បម្រាមធ្វើដំណើរ ចំពោះរដ្ឋមន្ត្រីគណៈរដ្ឋមន្ត្រីអ៊ីស្រាអែលស្តាំនិយមជ្រុល ២រូប កាលពីខែកក្កដា ដោយចោទប្រកាន់ពួកគេពីបទញុះញង់ឲ្យមានអំពើហិង្សាប្រឆាំងនឹងជនជាតិប៉ាឡេស្ទីន និងបានអំពាវនាវឲ្យមាន «ការបោសសម្អាតជនជាតិភាគតិច» នៃតំបន់ហ្កាហ្សា ប៉ុន្តែរដ្ឋាភិបាលបានស្ទាក់ស្ទើរ ក្នុងចាត់វិធានការបន្ថែមទៀត រហូតដល់ពេលនេះ។

កាលពីខែមុន អតីតរដ្ឋមន្ត្រីការបរទេស លោក Casper Veldkamp បានលាលែងពីតំណែង ដោយសារតែលោកបាននិយាយថា លោកមានអារម្មណ៍ថា មិនទទួលបានការគាំទ្រនៅក្នុងគណៈរដ្ឋមន្ត្រី ដើម្បីចាត់វិធានការបន្ថែមប្រឆាំងនឹងអ៊ីស្រាអែល។

ប៉ុន្តែអ្នកស្នងតំណែងលោក គឺលោក David van Weel បានប្រាប់សភាកាលពីល្ងាចថ្ងៃពុធថា លោកបានណែនាំឲ្យក្រសួងរបស់លោកព្រាងក្រឹត្យរបស់រដ្ឋាភិបាល ស្តីពីការហាមឃាត់ការនាំចូល ដោយបញ្ជាក់ថាវិធានការនេះនឹងត្រូវបានអនុវត្តឲ្យបានឆាប់តាមដែលអាចធ្វើទៅបាន។

ហូឡង់គឺជាប្រទេសនាំមុខគេលើពិភពលោក ក្នុងការទិញទំនិញរបស់អ៊ីស្រាអែល ប៉ុន្តែលោក Van Weel មិនបាននិយាយអំពីទំហំទំនិញដែលត្រូវបាននាំចូលនាពេលបច្ចុប្បន្ន ពីតំបន់តាំងទីលំនៅរបស់ជនជាតិជ្វីហ្វនោះឡើយ។

សហគមន៍អន្តរជាតិភាគច្រើនចាត់ទុកការតាំងទីលំនៅរបស់អ៊ីស្រាអែល នៅតំបន់ West Bank គឺខុសច្បាប់ ក្រោមច្បាប់អន្តរជាតិ។ តែរដ្ឋាភិបាលអ៊ីស្រាអែលចាត់ទុកការតាំងទីលំនៅនេះស្របច្បាប់ ក្រោមច្បាប់របស់ខ្លួន៕