UN៖ ​អគ្គលេខាធិការ​អង្គការសហប្រជាជាតិលោក Antonio Guterres បានបង្ហាញ​ការព្រួយបារម្ភ​ខ្លាំងចំពោះ​រដ្ឋប្រហារ​នាពេល​ថ្មីៗ​នេះ នៅក្នុង​ប្រទេស​បួ​គី​ណា​ហ្វា​សូ​។ ​ថ្លែង​ទៅកាន់​អ្នកសារព័ត៌មាន​នៅ​ទីក្រុង​ញូវយ៉ក​កាលពី​ថ្ងៃ​អង្គារ អ្នកការទូត​អង្គការ​សហប្រជាជាតិបាន​សង្កត់ធ្ងន់​ពី​តួនាទី​របស់​យោធា​ត្រូវតែ​ការពារ​ប្រទេស និង​ប្រជាជន​របស់​ពួកគេ ​មិនមែន​ដើម្បីវាយប្រហារ​រដ្ឋាភិបាល​របស់​ពួកគេ និង​ប្រយុទ្ធ​ដើម្បី​អំណាច​នោះទេ។

លោក Guterres បាន​និយាយថា តំបន់​នេះ​បាន​ប្រឈមមុខ​ទៅនឹង​ក្រុម​ជ្រុលនិយម និងការគំរាមកំហែង​ផ្សេងទៀតចំពោះ​សន្តិភាព និងសន្តិសុខ​អន្តរជាតិ​។​ ​លោក​បាន​អំពាវនាវ​ដល់​កងទ័ព​នៃ​ប្រទេស​ទាំងនេះ ​ឲ្យបំពេញ​តួនាទី​របស់​កងទ័ពដើម្បី​ការពារ​ប្រទេស​របស់​ពួកគេ និង​បង្កើត​ស្ថាប័ន​លទ្ធិប្រជាធិបតេយ្យ​ឡើងវិញ​។​ ​កាលពី​ថ្ងៃ​អង្គារ រដ្ឋធានី​របស់​ប្រទេស​បួ​គី​ណា​ហ្វា​សូ ប្រជាជន​រាប់សិប​នាក់​អបអរច្រៀង និង​រាំ​ក្នុងការបង្ហាញ​ការគាំទ្រ​ដល់​របប​ដឹកនាំ​ដោយ​យោធា​ថ្មី ដែល​បាន​បណ្តេញប្រធានាធិបតី​ជាប់ឆ្នោត​តាម​លទ្ធិប្រជាធិបតេយ្យ​លោក Roch Marc Christian Kabore និង​បាន​ដណ្តើមបាន​ការគ្រប់គ្រង​ប្រទេស​។ របប​យោធា​បាន​បិទ​ព្រំដែន បានដាក់​បម្រាម​គោចរ ផ្អាក​រដ្ឋធម្មនុញ្ញ និង​រំលាយ​រដ្ឋាភិបាល និង​សភា ហើយ​បាន​និយាយថា​ ខ្លួន​នឹង​បង្វែរ​ប្រទេសបួ​គី​ណា​ហ្វា​សូទៅរក​បទបញ្ជា​រដ្ឋធម្មនុញ្ញ ប៉ុន្តែ​មិនបានបញ្ជាក់​នៅពេលណា​នោះទេ​។​ ទាហាន​បាន​និយាយថា ប្រធានាធិបតី​ដែល​ត្រូវបាន​ផ្តួលរំលំ​គឺមាន​សុវត្ថិភាព ប៉ុន្តែ​មិនបាន​បង្ហាញ​ពី​ទី​កន្លែង​ដែល​លោក​ត្រូវបាន​គេ​ឃុំខ្លួន​នោះទេ​៕

អត្ថបទ៖ ប៊ុនថន