លោកនាយករដ្ឋមន្រ្តី Robert Fico បាននិយាយនៅថ្ងៃព្រហស្បតិ៍ (ទី១១ ខែកញ្ញា) នេះថា ប្រទេសស្លូវ៉ាគីមិនអាចគាំទ្រការដាក់ទណ្ឌកម្មរបស់សហភាពអឺរ៉ុប (EU) បន្ថែមទៀត លើរុស្ស៊ីបាននោះឡើយ រហូតទាល់តែទទួលបានសំណើរបស់ EU ដែលធ្វើឲ្យគោលដៅអាកាសធាតុស្របជាមួយនឹងតម្រូវការរបស់ក្រុមហ៊ុនផលិតរថយន្ត និងឧស្សាហកម្មធុនធ្ងន់។

ជាមួយគ្នានេះ លោក Fico ក៏ទាមទារផងដែរនូវវិធានការ ក្នុងការដោះស្រាយតម្លៃអគ្គិសនី នៅក្នុងប្លុកនេះ។ EU កំពុងពិភាក្សាលើកញ្ចប់ទណ្ឌកម្មទី១៩ ប្រឆាំងនឹងរុស្ស៊ី ជុំវិញការឈ្លានពានលើអ៊ុយក្រែន។

អ្នកការទូត EU បានប្រាប់ឲ្យដឹងថា កញ្ចប់ទណ្ឌកម្មថ្មីមួយ ទំនងជារួមបញ្ចូលការចុះបញ្ជីក្រុមហ៊ុនចិន ធនាគាររុស្ស៊ី និងនាវាជាច្រើនគ្រឿងទៀតដែលទីក្រុងមូស្គូប្រើប្រាស់ជានាវាស្រមោល ដើម្បីគេចពីទណ្ឌកម្ម ក៏ដូចជាការហាមឃាត់លើប្រតិបត្តិការប្រេងរុស្ស៊ី។

លោក Fico ដែលបានឈរនៅក្រៅជួររបស់សម្ព័ន្ធមិត្តអឺរ៉ុប ជុំវិញជំហរគាំទ្រទីក្រុងមូស្គូរបស់លោក និងដែលបានជួបប្រធានាធិបតីរុស្ស៊ី លោក Vladimir Putin ៣ដងរួចមកហើយ ចាប់តាំងពីឆ្នាំមុន បានប្រកែកជាយូរមកហើយថា ទណ្ឌកម្មមិនមានប្រយោជន៍នោះទេ។

នៅថ្ងៃព្រហស្បតិ៍នេះ លោក Fico បាននិយាយថា លោកនឹង «មិនគាំទ្រការអនុម័តកញ្ចប់ទណ្ឌកម្មមួយផ្សេងទៀតទេ ប្រសិនបើគណៈកម្មការមិនដាក់សំណើជាក់ស្តែងដែលនឹងធ្វើឲ្យតម្រូវការអាកាសធាតុស្របជាមួយតម្រូវការនៃការផលិតរថយន្ត មិនត្រឹមតែនៅក្នុងប្រទេសស្លូវ៉ាគី ហើយនិងស្របជាមួយនឹងតម្រូវការនៃឧស្សាហកម្មធុនធ្ងន់»។

បន្ទាប់ពីបានជួបជាមួយប្រធានក្រុមប្រឹក្សា EU លោក Antonio Costa នៅទីក្រុង Bratislava លោក Fico បានបន្ថែមនៅក្នុងការអត្ថាធិប្បាយរបស់លោកថា៖ «ខ្ញុំនឹងមិនគាំទ្រកញ្ចប់ទណ្ឌកម្មបន្ថែមទៀតទេ ប្រសិនបើគណៈកម្មការអឺរ៉ុបមិនដាក់សំណើជាក់ស្តែង ទាក់ទងនឹងតម្លៃអគ្គិសនីនៅអឺរ៉ុប»៕