គ្រួសារជម្លៀសខ្លួន Al-Rasheed Al-Tahir ដែលរត់គេចចេញពីអំពើហិង្សាកើនឡើង នៅទីក្រុង al-Fashir បានជួបជុំគ្នាវិញ នៅក្នុងទីក្រុងជំរំ al-Dabba ស្ថិតនៅតំបន់ភាគខាងជើងប្រទេសស៊ូដង់ ។

គ្រួសារមួយនេះ បានរត់ភៀសខ្លួនចេញពីទីក្រុង al-Fashir ដែលជារដ្ឋធានីរដ្ឋ North Darfur ក្រោយការប្រយុទ្ធគ្នារវាងកងទ័ពស៊ូដង់ និងកងកម្លាំងគាំទ្ររហ័ស(RSF) បានកើនឡើងនៅក្នុងទីក្រុងមួយនេះ ។

លោក Al-Rasheed ដែលបាត់បង់បងស្រី Abeer អំឡុងការវាយប្រហាររបស់កងកម្លាំង RSFកាលពីខែកុម្ភៈ និយាយថា លោកបានចាកចេញពីទីក្រុង al-Fashir ទៅកាន់ទីក្រុង Omdurman ជាទីដែលលោកមានផែនការឲ្យគ្រួសាររបស់លោកបោះជំរំនៅទីនោះ ។ ក្រោយមក លោកបានវិលត្រឡប់មកកាន់ទីក្រុង al-Dabba វិញ ដើម្បីស្វែងរកគ្រួសាររបស់លោក ។

អ្នកស្រី Rawiyah ដែលត្រូវជាប្អូនស្រីរបស់លោក Al-Rasheed និយាយខណៈរំឭកដល់ការស្លាប់របស់បងស្រីគាត់ថា នេះគឺជាស្ថានភាពដ៏លំបាកបំផុតនៅក្នុងឆាកជីវិតរបស់គាត់ ។ គាត់នៅតែមិនអាចបំភ្លេចបាននោះទេចំពោះស្ថានភាពមួយនេះ ។

ស្របពេលដែលការឡោមព័ទ្ធរបស់កងកម្លាំង RSFកាន់តែខ្លាំងក្លានៅទីក្រុង al-Fashir ពលរដ្ឋមួយចំនួនតូចដែលអាចបង់ប្រាក់ ដើម្បីរត់គេចបាន បានរៀបរាប់ពីការរស់នៅក្រោមការផ្លោងគ្រាប់កាំភ្លើងធំឥតឈប់ឈរ និងការចរចាអំពើហិង្សានៅប៉ុស្តិ៍ត្រួតពិនិត្យ ដើម្បីអាចចាកចេញពីទីក្រុងមួយនេះបាន ជាទីដែលពលរដ្ឋបង្ខំចិត្តបរិភោគចំណីសត្វ ។

នៅដើមសប្តាហ៍នេះ បេសកកម្មអង្គការសហប្រជាជាតិ(UN) បានរកឃើញថា កងកម្លាំង RSF បានប្រព្រឹត្តឧក្រិដ្ឋកម្មប្រឆាំងមនុស្សជាតិនៅទីក្រុង al-Fashir ដែលជាតំបន់លាក់ខ្លួនចុងក្រោយរបស់កងទ័ពស៊ូដង់ នៅតំបន់ Darfur ស្ថិតនៅភាគខាងលិចប្រទេស ។ 

សូមបញ្ជាក់ថា សង្រ្គាមរយៈពេល ២ឆ្នាំកន្លះ រវាងកងកម្លាំង RSF និងកងទ័ពស៊ូដង់ បានបង្កើតអ្វីដែល UN ចាត់ទុកថាជាវិបត្តិមនុស្សធម៌ដ៏អាក្រក់បំផុតរបស់លើពិភពលោកនៅប្រទេសស៊ូដង់ ។

UNប៉ាន់ប្រមាណថា មនុស្សជិត ពាក់កណ្តាលលាននាក់ បានរត់ភៀសខ្លួនចេញពីទីក្រុង al-Fashir ចាប់តាំងពីការប្រយុទ្ធគ្នាផ្ទុះឡើងកាលពីខែឧសភា ឆ្នាំ ២០២៤ ហើយមនុស្ស ២៧ម៉ឺននាក់ទៀត បន្តស្នាក់នៅក្នុងទីក្រុងមួយនេះ ៕