មន្ត្រីទីក្រុងបាននិយាយថា ការផ្ទុះរថយន្តដឹកឧស្ម័នមួយគ្រឿងបានបង្កឱ្យមានអគ្គិភ័យឆាបឆេះយ៉ាងសន្ធោសន្ធៅនៅលើផ្លូវហាយវ៉េមួយកន្លែងនៅភាគអាគ្នេយ៍ទីក្រុង Mexico City កាលពីថ្ងៃពុធ ទី១០ ខែកញ្ញា ដោយបានបណ្តាលឲ្យអ្នកស្លាប់កើនឡើងដល់៨នាក់ និងរងរបួសយ៉ាងហោចណាស់៩៤នាក់ ក្នុងនោះ២៨នាក់ស្ថិតក្នុងស្ថានភាពធ្ងន់ធ្ងរ។

អាជ្ញាធរទីក្រុងនិយាយថា ឧបទ្ទវហេតុនេះបានកើតឡើងនៅពេលដែលរថយន្តដឹកឧស្ម័នមួយគ្រឿងបានក្រឡាប់ហើយផ្ទុះនៅលើផ្លូវហាយវ៉េក្បែរព្រំដែនរវាងទីក្រុង Iztapalapa និងទីក្រុង Chalco នៅជាយរដ្ឋម៉ិកស៊ិក។ ក្រុមអ្នកពន្លត់អគ្គិភ័យបានឆ្លើយតបយ៉ាងរហ័សក្នុងការពន្លត់អគ្គិភ័យ។

ក្នុងអំឡុងសន្និសីទសារព័ត៌មាន ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) បានចាត់ទុកឧបទ្ទវហេតុនេះថាជា «សោកនាដកម្មដ៏មហន្តរាយ» ហើយបានសង្កត់ធ្ងន់លើតម្រូវការដើម្បីស៊ើបអង្កេតពីមូលហេតុដើម្បីការពារគ្រោះថ្នាក់នៅពេលខាងមុខ។

លោកស្រី Sheinbaum បាននិយាយបន្ថែមថា ក្រុមហ៊ុនដែលទទួលខុសត្រូវបានអះអាងថា ការធានារ៉ាប់រងរបស់ក្រុមហ៊ុនគឺធ្វើឡើងតាមលំដាប់ ហើយនឹងជួយដល់ជនរងគ្រោះ។ ឧបទ្ទវហេតុបែបនេះបានបង្កើនការព្រួយបារម្ភអំពីសុវត្ថិភាពឧស្សាហកម្ម និងការត្រៀមលក្ខណៈសង្គ្រោះបន្ទាន់នៅក្នុងតំបន់ទីក្រុងដែលមានប្រជាជនរស់នៅច្រើន។