ខណៈក្រុមបាតុករនៅប្រទេសនេប៉ាល់បានសម្រុកចូលទៅក្នុងសភាក្នុងសប្តាហ៍នេះ ដោយបង្ខំឱ្យនាយករដ្ឋមន្ត្រីលាលែងពីដំណែង សណ្ឋាគារប្រណីតៗនិងលំនៅឋានជាច្រើនកន្លែងត្រូវបានវាយប្រហារដោយក្រុមអ្នកលួចដុតក្នុងពេលមានកំហឹងចំពោះរបៀបរស់នៅចំណាយខ្ជះខ្ជាយរបស់ក្រុមវរជននៅក្នុងប្រទេសក្រីក្របំផុតមួយក្នុងពិភពលោក។

បាតុកម្មដែលគេនិយមហៅថាការតវ៉ា Gen Z មានអ្នកចូលរួមភាគច្រើនស្ថិតក្នុងវ័យជំទង់ ឬក្នុងវ័យ២០ ឆ្នាំ បានបង្កឱ្យមានភាពវឹកវរអាក្រក់បំផុតនៅក្នុងប្រទេសនេប៉ាល់ក្នុងរយៈពេលជាច្រើនឆ្នាំមកនេះ ដោយបង្ខំឱ្យមេដឹកនាំដែលពុំមានប្រជាប្រិយភាព លោក KP Sharma Oli លាលែងពីតំណែងកាលពីថ្ងៃអង្គារ ទី៩ ខែកញ្ញា មួយថ្ងៃបន្ទាប់ពីបាតុករ១៩នាក់ ត្រូវបានសម្លាប់ក្នុងអំពើហិង្សា។

ក្រសួងសុខាភិបាលប្រទេសនេប៉ាល់ បាននិយាយថាចំនួនអ្នកស្លាប់បានកើនឡើងដល់៣៤នាក់ ហើយមនុស្សជាង១.៣០០នាក់បានរងរបួស។ មេដឹកនាំនៃចលនាតវ៉ា Gen Z បាននៅឆ្ងាយពីការវាយប្រហារដោយការលួចដុតដោយដាក់កំហុសលើជនបង្កប់ ប៉ុន្តែអ្នកវិភាគបានចង្អុលទៅរកការកើនឡើងនៃការខកចិត្តចំពោះវិសមភាពទ្រព្យសម្បត្តិនៅក្នុងប្រទេសនេប៉ាល់ និងចំពោះអំពើពុករលួយក្នុងជួរអ្នកដឹកនាំនយោបាយរបស់ប្រទេសនេប៉ាល់។

ខណៈអគារសភា ការិយាល័យនាយករដ្ឋមន្ត្រី និងតុលាការកំពូលនៅតែមានភ្លើងឆេះ អ្នកលួចដុតក៏បានវាយប្រហារនៅតាមសណ្ឋាគារលំដាប់ផ្កាយប្រាំដ៏ប្រណិតជាច្រើនកន្លែង។