អនុរដ្ឋមន្ត្រីការបរទេសអាមេរិក លោក Christopher Landau កាលពីថ្ងៃព្រហស្បតិ៍ (១១ កញ្ញា) បានព្រមានថា ទីក្រុងវ៉ាស៊ីនតោន អាចនឹងចាត់វិធានការយ៉ាងចាស់ដៃប្រឆាំងនឹងជនបរទេសណា ដែល "កោតសរសើរ ប្រើលេសដើម្បីឱ្យការបាញ់ប្រហារនេះជារឿងសមហេតុផល ឬការលេងសើចបែបចំអកថាជារឿងធម្មតាៗ លើការបាញ់សម្លាប់សកម្មជនអភិរក្សនិយម លោក Charlie Kirk"។

លោក Landau បាននិយាយក្នុងការបង្ហោះលើវេទិកាសង្គម X ថា "ក្រោយការធ្វើឃាតដ៏គួរឱ្យរន្ធត់នៃឥស្សរជននយោបាយឈានមុខគេរបស់អាមេរិក ទីក្រុងវ៉ាស៊ីនតោនចង់គូសបញ្ជាក់ថា ជនបរទេសណាដែលលើកតម្កើងអំពើហិង្សា និងការស្អប់ខ្ពើម មិនត្រូវស្វាគមន៍ជាភ្ញៀវទៅកាន់អាមេរិកនោះទេ"។

លោកបន្តថា "លោកមានការខ្ពើមរអើមជាខ្លាំង នៅពេលមើលឃើញមនុស្សមួយចំនួនលើប្រព័ន្ធផ្សព្វផ្សាយសង្គម បានលើកសរសើរ ប្រើហេតុផលមកបញ្ជាក់ ឬលេងសើចចំអកឱ្យព្រឹត្តិការណ៍ដ៏ឃោរឃៅនេះ ហើយអាមេរិកបានណែនាំមន្ត្រីកុងស៊ុលខ្លួន ឱ្យចាត់វិធានការសមស្របទាក់ទងនឹងរឿងនេះ" ប៉ុន្តែលោកមិនបានបញ្ជាក់លម្អិតទេថា តើការចាត់វិធានការនេះមានន័យយ៉ាងណា។

នៅពេលត្រូវសាកសួរទាក់ទងនឹងរឿងនេះ អ្នកនាំពាក្យក្រសួងការបរទេសម្នាក់និយាយថា "រដ្ឋបាលវ៉ាស៊ីនតោនជឿថា សហរដ្ឋអាមេរិកមិនគួរផ្តល់ទិដ្ឋាការដល់បុគ្គលណាម្នាក់ ដែលវត្តមានរបស់ពួកគេនៅលើទឹកដីអាមេរិក មិនស្របតាមផលប្រយោជន៍សន្តិសុខជាតិរបស់អាមេរិកនោះទេ"។

គួរឱ្យដឹងថា លោក Kirk វ័យ ៣១ឆ្នាំ ដែលជាអ្នកនិពន្ធ ពិធីករផតខាស និងជាមនុស្សជំនិតរបស់ប្រធានាធិបតីអាមេរិក ត្រូវបានបាញ់សម្លាប់ចំកញ្ចឹងក កាលពីថ្ងៃពុធ ដោយគ្រាប់កាំភ្លើងតែមួយគ្រាប់ប៉ុណ្ណោះ ខណៈពេលកំពុងថ្លែងសុន្ទរកថានៅសាកលវិទ្យាល័យក្នុងរដ្ឋ Utah ជាអ្វីដែលលោកប្រធានាធិបតី Donald Trump បានហៅថាជា "ការធ្វើឃាតដ៏កាចសាហាវ"៕