ប្រធានាធិបតីអ៊ុយក្រែន លោក Volodymyr Zelenskyy កាលពីថ្ងៃព្រហស្បតិ៍ (១១ កញ្ញា) បានជំរុញសម្ព័ន្ធមិត្តរបស់ទីក្រុងគីវ ឱ្យគិតឡើងវិញអំពីសមត្ថភាពការពារដែនអាកាសរបស់ពួកគេ បន្ទាប់ពីការជ្រៀតចូលក្នុងដែនអាកាសប៉ូឡូញ ដោយយានដ្រូនជាច្រើនគ្រឿង ដែលទីក្រុងវ៉ាសូវី អះអាងថាជាអាវុធអាកាសរបស់រុស្ស៊ី។

ថ្លែងក្នុងទីក្រុងគីវ នៅខាងក្រៅដំណើរទស្សនកិច្ចរបស់ប្រធានាធិបតីហ្វាំងឡង់ Alexander Stubb លោក Zelenskyy បាននិយាយថា អ៊ុយក្រែន "បើកទូលាយ និងត្រៀមខ្លួនរួចជាស្រេច" ដើម្បីផ្តល់ការគាំទ្រសម្រាប់កិច្ចប្រឹងប្រែងរបស់សម្ព័ន្ធមិត្ត។ គួរឱ្យដឹងថា អ៊ុយក្រែនបានទប់ទល់ការវាយប្រហារច្រកអាកាសរាប់មិនអស់ ចាប់តាំងពីប្រតិបត្តិការយោធារបស់រុស្ស៊ីបានចាប់ផ្តើមមក ដោយប្រើតែអាវុធផ្គត់ផ្គង់ពីបរទេស និងសព្វាវុធផលិតក្នុងស្រុកប៉ុណ្ណោះ រាប់ចាប់ពីកាំភ្លើងយន្តចាស់ៗ ដល់មីស៊ីលទំនើប។

លោក Zelenskyy និយាយថា បណ្តាប្រទេសដូចជាប៉ូឡូញ គួរតែគិតឡើងវិញ និងស្វែងរកវិធីសាស្រ្តពហុស្រទាប់ស្រដៀងគ្នានេះ ដោយសារប្រព័ន្ធមីស៊ីលដូចជា Patriot ដែលផលិតដោយអាមេរិក មានតម្លៃថ្លៃពេកក្នុងការប្រើប្រឆាំងយានដ្រូនតម្លៃថោក ដែលប្រើដោយរុស្ស៊ី។ លោកសង្កត់ធ្ងន់ថា៖ "លើពិភពលោកនេះ ពុំមានប្រទេសណាមួយមានមីស៊ីលគ្រប់គ្រាន់ដើម្បីបាញ់ទម្លាក់ដ្រូនគ្រប់ប្រភេទនោះទេ"។

លោក Zelenskyy បន្ថែមថា អ៊ុយក្រែន — ដែលពឹងផ្អែកខ្លាំងលើប្រព័ន្ធការពារដែនអាកាសរយៈចម្ងាយឆ្ងាយរបស់លោកខាងលិច ប៉ុន្តែបានបង្កើតវិធីសាស្រ្តក្នុងស្រុកដ៏ទំនើបមួយដើម្បីទប់ទល់ការវាយប្រហារជាច្រើនលើកច្រើនសាររបស់រុស្ស៊ី— គួរតែមានបទពីសោធន៍គ្រប់គ្រាន់ក្នុងការផ្តល់ការណែនាំដល់សម្ព័ន្ធមិត្តរបស់ខ្លួនលើបញ្ហាបែបនេះ៕