កាសែតថៃបានរាយការណ៍ថា បំណុលជាតិរបស់ប្រទេសនស្ថិតក្នុងចំណោមអត្រាខ្ពស់បំផុត ដែលបច្ចុប្បន្នឈរនៅប្រហែល ៦៧,៩% នៃផលិតផលក្នុងស្រុកសរុប GDP ដែលជាកម្រិតបំណុលខ្ពស់ខ្លាំងជាងប្រទេសអាស៊ានមួយចំនួន ហើយត្រូវព្យាករថានឹងកើនឡើងបន្ថែមទៀតដល់ ៦៨,៩% នៃ GDP នៅឆ្នាំ២០២៨ ដែលនាំឱ្យមូលនិធិរូបិយវត្ថុអន្តរជាតិ IMF មានការព្រួយបារម្ភ និងជំរុញឱ្យប្រុងប្រយ័ត្ន។

ចំណុចនេះបានកើតឡើងស្របពេលសេដ្ឋកិច្ចដ៏ត្រដាបត្រដួសស្រាប់ទៅហើយរបស់ប្រទេសថៃ ដែលកាន់តែធ្ងន់ធ្ងរឡើងថែមទៀតដោយសារតែចលាចលខាងនយោបាយបានដាក់បន្ទុក ហើយវិស័យទេសចរណ៍ដ៏សំខាន់របស់ប្រទេសនេះក៏បានស្រុតចុះជាលំដាប់។

បញ្ហានេះមួយផ្នែកដោយសារតែរចនាសម្ព័ន្ធថវិកា ដែលគ្របដណ្តប់លើសលប់ដោយការចំណាយដដែលៗ ដែលមានចំនួនជាង ៧០% នៃការចំណាយសរុប និងជារឿងលំបាកកាត់បន្ថយ រួមជាមួយនឹងវិធានការជំរុញសេដ្ឋកិច្ចរយៈពេលខ្លីជាបន្តបន្ទាប់ និងគម្រោងបន្ធូរបន្ថយពន្ធយ៉ាងទូលំទូលាយ។

លោកស្រី Julie Kozack អ្នកនាំពាក្យរបស់មូលនិធិរូបិយវត្ថុអន្តរជាតិ (IMF) បានរំលឹកឡើងវិញនូវក្ដីកង្វល់ដ៏ខ្លាំងនេះ នៅពេលឆ្លើយសំណួរក្នុងអំឡុងសន្និសីទសារព័ត៌មានប្រចាំខែរបស់ IMF កាលពីថ្ងៃព្រហស្បតិ៍ ទី១១ ខែកញ្ញា។

លោកស្រីបានកត់សម្គាល់ថា បំណុលជាតិរបស់ថៃ មានកម្រិតខ្ពស់ខ្លាំងរួចទៅហើយបើធៀបនឹងប្រទេសជិតខាង ក្នុងដំណាក់កាលនៃការអភិវឌ្ឍស្រដៀងគ្នានេះ។ អាស្រ័យហេតុនេះ រដ្ឋាភិបាលថៃ បច្ចុប្បន្ន ត្រូវតែអនុវត្តការយកចិត្តទុកដាក់ និងប្រុងប្រយ័ត្នឱ្យបានខ្លាំងក្នុងការគ្រប់គ្រងសារពើពន្ធ ហើយទន្ទឹមនឹងនោះ ក៏ត្រូវបង្កើតតំបន់ទ្រនាប់ក្នុងហិរញ្ញវត្ថុសាធារណៈផងដែរ ដើម្បីផលប្រយោជន៍រយៈពេលវែងរបស់សេដ្ឋកិច្ចដែលលំបាកខ្លាំងរបស់ថៃ៕