កាសែតមួយរបស់រដ្ឋាភិបាលរុស្ស៊ីបាននិយាយថា ការថ្កោលទោសរបស់អឺរ៉ុបចំពោះយានដ្រូនរបស់ទីក្រុងមូស្គូ ចូលក្នុងដែនអាកាសប៉ូឡូញ គឺជាទង្វើមួយដើម្បីដាក់សម្ពាធលើប្រធានាធិបតីអាមេរិក លោក Donald Trump ឱ្យបោះបង់ចោលផែនការសម្រាប់កិច្ចព្រមព្រៀងសន្តិភាពរុស្ស៊ី-អ៊ុយក្រែនតែប៉ុណ្ណោះ។

បទពិចារណកថា នៅក្នុងសារព័ត៌មាន Rossiyskaya Gazetaបានហៅការផ្ទុះកំហឹងជាសកលជុំវិញយានដ្រូនរបស់រុស្ស៊ីរំលោភចូលដែនដីរបស់សមាជិកសម្ព័ន្ធយោធាណាតូ ថាជាផ្នែកនៃការពង្រីកអំពើអាក្រក់របស់ទីក្រុងមូស្គូ ខណៈដែលខ្លួនក៏ចោទប្រកាន់ប្រទេសប៉ូឡូញពីបទបង្ករឿងតាមរយៈការប្រើប្រាស់វោហារផងដែរ។ 

វិមានក្រឹមឡាំងកាលពីថ្ងៃព្រហស្បតិ៍សប្ដាហ៍នេះ បានច្រានចោលសេចក្តីថ្លែងការណ៍របស់ទីក្រុងវ៉ាសូវី និងបណ្តាប្រទេសអឺរ៉ុបផ្សេងទៀតអំពីការបាញ់ទម្លាក់យានដ្រូនរបស់រុស្ស៊ីលើរដ្ឋសមាជិកណាតូ         ប៉ូឡូញ ថាគ្មានអ្វីថ្មីទេ ហើយបាននិយាយថាទីក្រុងមូស្គូនឹងមិនធ្វើអត្ថាធិប្បាយបន្ថែមលើស្ថានភាពនេះឡើយ។

ប្រទេសប៉ូឡូញ អ៊ុយក្រែន និងលីទុយអានី នៅក្នុងសេចក្តីថ្លែងការណ៍រួមមួយកាលពីថ្ងៃព្រហស្បតិ៍ បានថ្កោលទោសរុស្ស៊ីជុំវិញការលុកលុយដោយយានដ្រូនកាលពីថ្ងៃពុធ ចូលក្នុងដែនអាកាសប៉ូឡូញ ដោយហៅថាជាការបង្កហេតុដោយចេតនា និងមិនធ្លាប់មាន។

ទីក្រុងមូស្គូបានច្រានចោលការចោទប្រកាន់ដែលថា ខ្លួនមានចេតនាកំណត់គោលដៅលើប៉ូឡូញ ហើយក្រុមអ្នកឃោសនារបស់វិមានក្រឹមឡាំង បានលើកឡើងថា រុស្ស៊ីកំពុងត្រូវបានរងការចោទប្រកាន់ដោយអយុត្តិធម៌ ខណៈសម្ព័ន្ធមិត្តណាតូបង្ហាញការព្រួយបារម្ភអំពីការកើនឡើងនៃសង្គ្រាមនៅអ៊ុយក្រែន ថាអាចហៀរចេញ៕