មេបញ្ជាការយោធារបស់ទីក្រុងប៊ែរឡាំង និយាយក្នុងឯកសារសម្ងាត់មួយមើលឃើញដោយសារព័ត៌មានរ៉យទ័រ នៅថ្ងៃព្រហស្បតិ៍ (១១ កញ្ញា) ថា កងទ័ពអាល្លឺម៉ង់ ត្រូវតែបន្ថែមកម្លាំងទាហានសកម្ម ១០ម៉ឺននាក់ ដែលជាចំនួនលើសទ្វេដង ទៅក្នុងជួរយោធា ៦២.០០០នាក់ដែលមានស្រាប់របស់ខ្លួន ដើម្បីបំពេញតាមគោលដៅថ្មីរបស់អង្គការណាតូ ក្នុងបំណងជំរុញការត្រៀមខ្លួនទប់ទល់នឹងការគំរាមកំហែងកាន់តែខ្លាំងឡើងរបស់រុស្ស៊ី។

ប្រមុខទ័ពអាល្លឺម៉ង់ លោក Alfons Mais បានសរសេរក្នុងលិខិតមួយចុះថ្ងៃទី២ ខែកញ្ញា ផ្ញើទៅកាន់ប្រធានបុគ្គលិកការពារជាតិថា៖ «នេះជាភាពចាំបាច់សម្រាប់កងទ័ពដើម្បីត្រៀមខ្លួនឱ្យបានគ្រប់គ្រាន់សម្រាប់ធ្វើសង្គ្រាមនៅឆ្នាំ២០២៩ និងផ្តល់សមត្ថភាព ដែលអាល្លឺម៉ង់បានសន្យា (ដល់អង្គការណាតូ) នៅឆ្នាំ២០៣៥»។

លោក Mais បាននិយាយថា ការសម្រេចបាននូវគោលបំណងទាំងនេះគឺមិនអាចទៅរួចទេ ជាមួយនឹងកម្រិតបុគ្គលិកនាពេលបច្ចុប្បន្ន ដែលរួមមានកងទ័ពមិនសកម្មដល់ទៅ ៣៧.០០០នាក់។

ក្នុងតួលេខ ១០ម៉ឺននាក់នោះ លោក Mais បានអំពាវនាវឱ្យបង្កើនកងទ័ពសកម្មប្រហែល ៤៥.០០០នាក់ នៅឆ្នាំ២០២៩ ជាឆ្នាំដែលសម្ព័ន្ធណាតូដឹកនាំដោយសហរដ្ឋអាមេរិក និយាយថា ខ្លួនរំពឹងថា រុស្ស៊ីនឹងមានសមត្ថភាពវាយប្រហារទ្រង់ទ្រាយធំលើសម្ព័ន្ធយោធាលោកខាងលិចមួយនេះ។ ប្រមុខទ័ពរូបនេះបន្ថែមថា ក៏មានតម្រូវការសម្រាប់កងទ័ពសកម្មចំនួន ៤៥.០០០នាក់ទៀតនៅឆ្នាំ២០៣៥ ដើម្បីទប់ហានិភ័យ និងប្រមាណ ១ម៉ឺននាក់ដើម្បីពង្រឹងការការពារទឹកដី។ ទីក្រុងមូស្គូ បានបដិសេធឥតឈប់ឈរនូវចេតនាណាមួយដើម្បីបើកសង្គ្រាមប្រឆាំងនឹងណាតូ ឬសមាជិករបស់សម្ព័ន្ធយោធានេះ៕