នៅព្រឹកថ្ងៃសុក្រនេះ សភាពស្ងប់ស្ងាត់បានកើតមាននៅក្នុងទីក្រុងកដ្ឋម៉ាន់ឌូ រយៈពេលច្រើនថ្ងៃនៃបាតុកម្មប្រឆាំងអំពើពុករលួយដ៏តានតឹង ដែលបានសម្លាប់មនុស្សយ៉ាងហោច ៥១នាក់ ក្នុងសប្តាហ៍នេះ ក្នុងនោះ មនុស្សជាង ១.៣០០នាក់ បានរងរបួស ហើយនិងនាំឲ្យមានការលាលែងពីតំណែងរបស់លោកនាយករដ្ឋមន្រ្តី K.P. Sharma Oli ។

ទាហានបានបន្តល្បាតតាមដងផ្លូវដ៏ស្ងប់ស្ងាត់នៅក្នុងទីក្រុង ខណៈរថយន្តរងការឆាបឆេះ និងកម្ទេចកម្ទីរាយប៉ាយនៅតាមទីកន្លែងជាច្រើន ។ នៅអគារ Singha Durbar ដែលជាការិយាល័យរបស់នាយករដ្ឋមន្រ្តី និងក្រសួងជាច្រើនទៀត កងទ័ពត្រូវបានគេមើលឃើញនាំគ្នាលុបគំនូរលើជញ្ជាំង ។

លោកស្រី Sushila Karki ដែលជាអតីតប្រធានតុលាការកំពូលនេប៉ាល់ ទំនងជាត្រូវបានតែងតាំងជានាយករដ្ឋមន្រ្តីស្តីទី ។ នេះបើយោងតាមប្រភពជិតស្និតនឹងបញ្ហានេះ បានទម្លាយប្រាប់ទីភ្នាក់ងារព័ត៌មានរ៉យទ័រនៅថ្ងៃសុក្រនេះ ។

លោក Kamal Giri គឺជាសកម្មជនមួយរូប ចាត់ទុកការតែងតាំងលោកស្រី Karki ជាមេដឹកនាំស្តីទី ថាជារឿងគួរឲ្យកោតសរសើរពិតប្រាកដមួយ ។

ចលាចលដ៏អាក្រក់បំផុតក្នុងរយៈពេលជាច្រើនទសវត្សរ៍កន្លងមកនេះ នៅប្រទេសក្រីក្រតំបន់ភ្នំហិម៉ាឡៃមួយនេះ បង្កឡើងដោយសារបំរាមព័ត៌មានសង្គម ដែលត្រូវបានប្រកាសកាលពីសប្តាហ៍មុន ប៉ុន្តែវាបានថមថយទៅវិញ ក្រោយមនុស្ស ១៩នាក់ បានស្លាប់កាលពីថ្ងៃចន្ទ ពេលដែលនគរបាលបាញ់ឧស្ម័នបង្ហូរទឹកភ្នែក និងបាញ់គ្រាប់កាំភ្លើងកៅស៊ូ ដើម្បីគ្រប់គ្រងហ្វូងមនុស្ស ។

អគាររដ្ឋាភិបាលជាច្រើន ចាប់ពីអគារតុលាការកំពូល រហូតដល់ផ្ទះសម្បែងរបស់រដ្ឋមន្រ្តី រួមទាំងផ្ទះរបស់លោក Oli និងអគារសភា ត្រូវបានដុតបំផ្លាញផងដែរ នៅក្នុងបាតុកម្មកាលពីថ្ងៃអង្គារ ក្នុងនោះ ភាពរំជើបរំជួលបានស្រាកស្រាន្តទៅវិញខ្លះ បន្ទាប់ពីការលាលែងពីតំណែងរបស់លោក Oli ៕