ប្រទេសរុស្សី និងសម្ព័ន្ធមិត្តដ៏សំខាន់របស់ខ្លួន គឺបេឡារុស ចាប់ផ្តើមសមយុទ្ធយោធារួមគ្នាដ៏ធំ នៅថ្ងៃទី១២ ខែកញ្ញា ដោយធ្វើឲ្យអង្គការណាតូ (NATO) មានក្ដីបារម្ភ ពោលគឺប៉ុន្មានថ្ងៃ បន្ទាប់ពីប៉ូឡូញបានចោទប្រកាន់ទីក្រុងមូស្គូថា បានបង្កើនភាពតានតឹងតាមរយៈការបាញ់បង្ហោះយានដ្រូនវាយប្រហារតាមដែនអាកាសរបស់ខ្លួន។

ជាមួយគ្នានេះ សមយុទ្ធដែលមានឈ្មោះ «Zapad» នេះ ក៏កើតឡើងផងដែរ នៅពេលដែលកងកម្លាំងរុស្ស៊ី កំពុងវាយលុកតាមតំបន់ជួរមុខ នៅក្នុងប្រទេសអ៊ុយក្រែន និងបង្កើនការវាយប្រហារតាមអាកាសលើទីក្រុងនានារបស់អ៊ុយក្រែន។

ប្រទេសសមាជិកនៅប៉ែកខាងកើតរបស់អង្គការណាតូ ដែលមានព្រំប្រទល់ជាប់ប្រទេសបេឡារុស គឺប៉ូឡូញ លីទុយអានី និងឡាតវី មានការប្រុងប្រយ័ត្នខ្ពស់ ចំពោះសមយុទ្ធនេះ ដែលបេឡារុស បញ្ជាក់ថា នឹងធ្វើឡើងនៅជិត Borisov (បូរីសូវ) ដែលជាទីក្រុងមួយនៅភាគខាងកើតនៃរដ្ឋធានី Minsk (មីនស្ក៍)។

ប្រទេសទាំង៣ បានបង្កើនការពង្រឹងសន្តិសុខ នៅមុនមានសមយុទ្ធនេះ ដោយប៉ូឡូញបានបញ្ជាឲ្យបិទព្រំដែនទាំងស្រុងជាមួយបេឡារុស សម្រាប់រយៈពេលនេះ។ ហើយនាយករដ្ឋមន្រ្តីប៉ូឡូញ លោក Donald Tusk បានព្រមានអំពី «ថ្ងៃដ៏សំខាន់» សម្រាប់ប្រទេសរបស់លោក។

តែយ៉ាងណាក្ដី ទីក្រុងមូស្គូបានព្យាយាមសម្រាលក្ដីបារម្ភនេះ។ ដោយច្រានចោលការអះអាងរបស់ប៉ូឡូញដែលថា សមយុទ្ធគឺជាការបង្ហាញកម្លាំងឈ្លានពាននោះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានកាលពីថ្ងៃទី១១ ខែកញ្ញាថា៖ «ទាំងនេះគឺជាសមយុទ្ធដែលបានគ្រោងទុក វាមិនមែនជាការធ្វើឡើង ដោយមានបំណងប្រឆាំងនឹងប្រទេសណាមួយឡើយ»។

ដោយជាធម្មតាត្រូវធ្វើឡើងរៀងរាល់ ៤ឆ្នាំម្តង ការរៀបចំនូវសមយុទ្ធ Zapad ក្នុងឆ្នាំ២០២៥ នេះ គឺជាលើកទី១ ក្នុងអំឡុងពេលមានជម្លោះនៅអ៊ុយក្រែន ហើយនឹងដំណើរការរហូតដល់ថ្ងៃទី១៦ ខែកញ្ញា៕