យុទ្ធនាការតវ៉ា «Block Everything» (រាំរាំងគ្រប់យ៉ាង) នៅទូទាំងប្រទេស បានបង្ហាញពីបញ្ហាប្រឈម សម្រាប់លោកប្រធានាធិបតី Emmanuel Macron ហើយវាបានប្រែក្លាយថ្ងៃដំបូងរបស់លោក Sébastien Lecornu ក្នុងនាមជានាយករដ្ឋមន្ត្រីថ្មីរបស់ប្រទេស ស្ថិតក្នុងភាពច្របូកច្របល់។

ថ្វីត្បិតការតវ៉ាមិនអាចបិទគ្រប់យ៉ាងដូចក្រុមបាតុករចង់បានក៏ដោយ ក៏ការតវ៉ានៅតែអាចធ្វើឲ្យផ្នែកខ្លះនៃជីវិតប្រចាំថ្ងៃជួបការរំខាន និងបង្កជាបញ្ហានៅកន្លែងជាច្រើនទូទាំងប្រទេស។ ដើម្បីទប់ទល់នឹងចលនាតវ៉ានេះ កម្លាំងនគរបាលចំនួន ៨០.០០០នាក់ ត្រូវបានដាក់ពង្រាយ ខណៈកម្ដៅចាប់ផ្តើមកើនឡើង។

បើយោងសេចក្ដីរាយការណ៍ពីទូរទស្សន៍ BFM TV របស់បារាំង កាលពីថ្ងៃព្រហស្បតិ៍ (ទី១១ ខែកញ្ញា) បានឲ្យដឹងថា អាជ្ញាធរបារាំងបានចាប់ខ្លួនមនុស្សចំនួន ៦៧៥នាក់យ៉ាងតិច នៅទូទាំងប្រទេស ក្នុងអំឡុងពេលមានបាតុកម្ម «Block Everything» (រារាំងគ្រប់យ៉ាង) កាលពីថ្ងៃទី១០ ខែកញ្ញា ដោយ ១៨០នាក់ត្រូវបានឃុំខ្លួន នៅក្នុងតំបន់ក្រុងប៉ារីសតែមួយគត់។ ហើយបើយោងតាមក្រសួងមហាផ្ទៃ បានឲ្យដឹងថា ក្នុងចំណោមអ្នកត្រូវបានចាប់ខ្លួនទាំងនោះ ៥៤៩នាក់ ត្រូវបាននាំទៅឃុំខ្លួន នៅក្នុងមន្ទីរឃុំឃាំងរបស់នគរបាល បន្ទាប់ពីមានឧប្បត្តិហេតុ នាពេលយប់ ចន្លោះថ្ងៃពុធ និងថ្ងៃព្រហស្បតិ៍។

ស្នងការនគរបាលក្រុងប៉ារីស លោក Laurent Nunez បានរាយការណ៍ថា ការចាប់ខ្លួនថ្មី ត្រូវបានធ្វើឡើង បន្ទាប់ពីមានការប៉ះទង្គិចគ្នា នៅក្នុងរដ្ឋធានី ជាពិសេសនៅទីលាន Place des Fetes (ផ្លាស់ ដេ ហ្វែត)។ លោក Nunez បានពណ៌នាអំពីចលនាតវ៉ាថា ជា «ការប៉ុនប៉ងបរាជ័យ» ដោយកត់សម្គាល់ថា គ្មានការបិទផ្លូវធំណាមួយកើតឡើងនោះឡើយ ទោះបីជាព្យាយាមជាច្រើនដងក៏ដោយ។ លោក Nunez បានប្តេជ្ញាថាអាជ្ញាធរនឹងបន្តរក្សា «ការប្តេជ្ញាចិត្តដូចគ្នា ការប្រុងប្រយ័ត្នដូចគ្នា គោលការណ៍ដូចគ្នា» ដើម្បីទប់ស្កាត់ការបិទផ្លូវ នៅប៉ុន្មានថ្ងៃខាងមុខ និងប៉ុន្មានសប្តាហ៍ខាងមុខ។ បន្ទាប់ពីជាប់ឆ្នោតឡើងវិញ នៅឆ្នាំ២០២២ លោក Macron បានប្រឈមនឹងការមានកំហឹងយ៉ាងខ្លាំងក្លា ពាក់ព័ន្ធកំណែទម្រង់ប្រាក់សោធននិវត្តន៍ និងភាពចលាចលទូទាំងប្រទេស និងកុបកម្មនៅឆ្នាំ២០២៣ បន្ទាប់ពីនគរបាលបានបាញ់សម្លាប់ក្មេងជំទង់ម្នាក់ នៅជាយក្រុងប៉ារីស៕