កូដកម្មដែលបានកំណត់ពេលដោយសហជីពកម្មករ នៅអាកាសយានដ្ឋានចំនួន ១៥ នៅទូទាំងប្រទេសបានធ្វើឲ្យមានក្ដីបារម្ភ អំពីភាពរអាក់រអួលដែលអាចកើតមាន សម្រាប់អ្នកដំណើរ ជាពិសេសចំពេលមានការរំពឹងទុកអំពីកំណើននៃការធ្វើដំណើរតាមផ្លូវអាកាស ក្នុងអំឡុងពេលថ្ងៃឈប់សម្រាកដ៏ធំបំផុតរបស់ប្រទេសកូរ៉េខាងត្បូង នាខែក្រោយ។

សហជីពកម្មករ នៅអាកាសយានដ្ឋានធំៗ ក្នុងប្រទេសកូរ៉េខាងត្បូង បានធ្វើសន្និសីទសារព័ត៌មានកាលពីថ្ងៃទី៩ ខែកញ្ញា ហើយបានប្តេជ្ញាថា នឹងឈប់ធ្វើការ ចាប់ពីថ្ងៃទី១៩ ខែកញ្ញា រហូតដល់ថ្ងៃឈប់សម្រាក Chuseok ដែលនឹងបញ្ចប់នៅថ្ងៃទី៩ ខែតុលា។ កម្មករដែលចូលរួម គឺមកពីផ្នែកអាកាសយានដ្ឋានអន្តរជាតិ Incheon នៃសហជីពការងារសាធារណៈ និងសង្គម និងដឹកជញ្ជូនរបស់កូរ៉េ (KPTU) រួមជាមួយសហជីពឆ័ត្រ សម្រាប់អាកាសយានដ្ឋាន ក្នុងប្រទេស ដែលមានចំនួនកម្មករស្ថិតក្នុងការទទួលខុសត្រូវរួមបញ្ចូលគ្នា ១៥.០០០នាក់។

ការទាមទារចម្បងរបស់ពួកគេ គឺការផ្លាស់ប្តូរកាលវិភាគវេនរបស់ពួកគេ ដែលបច្ចុប្បន្នមានក្រុមចំនួន ៣ សម្រាប់វេនចំនួន២ ដែលបណ្តាលឲ្យកម្មករធ្វើការវេនថ្ងៃជាប់គ្នា ២ដង តាមមកដោយវេនយប់បន្តគ្នា ២ដង ដើម្បីធ្វើអាកាសយានដ្ឋានដំណើរការពេញ ២៤ម៉ោង។ កម្មករកំពុងទាមទារកាលវិភាគប្ដូរវេនចែកជា ៤ក្រុម ដើម្បីអាចឲ្យមានពេលសម្រាកបន្ថែមទៀត បន្ទាប់ពីវេនយប់។

ការទាមទារផ្សេងទៀតរបស់កម្មករសហជីព រួមមានការបង្កើនបុគ្គលិកព្រលានយន្តហោះ ជាពិសេសដោយមានការពង្រីកព្រលានយន្តហោះ Incheon ដែលបានបញ្ចប់កាលពីឆ្នាំមុន។ អ្នកចូលរួមនៃបាតុកម្មនាពេលខាងមុខ គឺជាអ្នកដែលមានតួនាទីសំខាន់ៗ នៅអាកាសយានដ្ឋាន ដូចជាការថែទាំអគារ និងផ្លូវរត់ជាដើម។ ការធ្វើដំណើរតាមយន្តហោះ នឹងមិនត្រូវបានបិទទេ ដោយសារវាត្រូវបានតម្រូវឲ្យបន្តដោយស្របច្បាប់ ទោះបីជាក្នុងអំឡុងពេលមានកូដកម្មក៏ដោយ៕