ភ្លៀងធ្លាក់ខ្លាំងបានបណ្តាលឲ្យមានទឹកជំនន់នៅផ្នែកខ្លះនៃទីក្រុងតូក្យូ កាលពីថ្ងៃព្រហស្បតិ៍ (ទី១១ ខែកញ្ញា) ដោយភ្លៀងធ្លាក់ និងខ្យល់បក់ខ្លាំងនេះ ត្រូវបានគេជឿថា បានបណ្ដាលឲ្យបុរសម្នាក់ស្លាប់ និងម្នាក់ទៀតរងរបួស នៅឯចំណតកុងតឺន័រ។

នគរបាលក្នុងតំបន់ បានឲ្យដឹងថា បុរស ២នាក់ ត្រូវបានសង្កត់ដោយកុងទីន័រ ដែលបានរលំធ្លាក់នៅឯកំពង់ផែក្នុងតំបន់ Ota Ward នៃទីក្រុងតូក្យូ។ បុរសម្នាក់ក្នុងវ័យ ៤០ឆ្នាំដែលធ្វើការបញ្ជាម៉ាស៊ីនលើកកុងតឺន័រ ត្រូវបានគេប្រកាសថា ស្លាប់នៅនឹងកន្លែង ខណៈមិត្តរួមការងារក្នុងវ័យ ៦០ឆ្នាំ ត្រូវបានបញ្ជូនទៅមន្ទីរពេទ្យ ដោយអាការរបួសមិនគំរាមកំហែងដល់អាយុជីវិតឡើយ។

សេវាកម្មដឹកជញ្ជូននានាក៏ត្រូវបានរំខានផងដែរ ក្នុងអំឡុងពេលមានភ្លៀងធ្លាក់ខ្លាំងនេះ។ ក្រុមហ៊ុនរថភ្លើង JR Tokai បានឲ្យដឹងថា សេវាកម្មប្រព័ន្ធរថភ្លើង Shinkansen រត់រវាងទីក្រុងតូក្យូ និងខេត្តជិតខាង Kanagawa ត្រូវបានផ្អាកជាបណ្តោះអាសន្ន ដែលនាំឲ្យប៉ះពាល់ដល់អ្នកដំណើរប្រហែល ១០០.០០០នាក់។ ចំណែកក្រុមហ៊ុន JR East ក៏បានរាយការណ៍ពីការពន្យារពេលសេវារថភ្លើងមួយចំនួន នៅក្នុងរដ្ឋធានីដែរ។ អាកាសធាតុមានភ្លៀងធ្លាក់ខ្លាំង អមដោយព្យុះផ្គររន្ទះនេះ ក៏បានប៉ះពាល់ផងដែរដល់អាកាសយានដ្ឋាន Haneda របស់ទីក្រុងតូក្យូ ដែលបណ្តាលឲ្យមានការពន្យារពេល និងការលុបចោលសេវាកម្មមួយចំនួន។

ទីភ្នាក់ងារឧតុនិយមជប៉ុនបានឲ្យដឹងថា ផ្នែកនៃតំបន់ Setagaya របស់ទីក្រុងតូក្យូ បានជួបប្រទះនឹងកម្រិតទឹកភ្លៀង ៩២មីលីម៉ែត្រ ហើយតំបន់ Ota មានកម្រិតដល់ទៅ ៨៨,៥មីលីម៉ែត្រ ត្រឹមរយៈពេលតែមួយម៉ោង កាលពីរសៀលថ្ងៃទី១១ ខែកញ្ញា ជាបរិមាណច្រើនបំផុតក្នុងកំណត់ត្រា សម្រាប់តំបន់នេះ។ ដោយផ្អែកលើការវិភាគតាមរ៉ាដា ទីភ្នាក់ងារនេះ បានប៉ាន់ប្រមាណថា តំបន់មួយចំនួន នៅភាគកណ្តាលទីក្រុងតូក្យូ បានមានកម្រិតទឹកភ្លៀងលើសពី ១០០មីលីម៉ែត្រ និងបានចេញសេចក្ដីព្រមានជាបន្តបន្ទាប់៕