ក្រុមអាជ្ញាធរ និយាយថា មនុស្សជាង ២លាននាក់ ត្រូវបានជម្លៀសចេញពីខេត្ត Punjab ប្រទេសប៉ាគីស្ថាន ស្របពេលដែលទឹកជំនន់ បានវាយប្រហារតំបន់ភាគខាងកើតប្រទេសមួយនេះ ។

លោក Inam Haider Malik គឺជាប្រធានទីភ្នាក់ងារគ្រប់គ្រងគ្រោះមហន្តរាយជាតិប៉ាគីស្ថាន និយាយប្រាប់ក្រុមអ្នកសារព័ត៌មានកាលពីថ្ងៃព្រហស្បតិ៍ថា មនុស្ស ១៥ម៉ឺននាក់ផ្សេងទៀត ត្រូវបានជម្លៀសខ្លួននៅខេត្ត Sindh ហើយលោកបានព្រមានថា ចំនួនមនុស្សជម្លៀសខ្លួនអាចនឹងកើនឡើង ក្នុងរយៈពេលប៉ុន្មានថ្ងៃខាងមុខនេះ។

យោងតាមការធ្វើបច្ចុប្បន្នពីអង្គភាពសុខាភិបាលអន្តរជាតិនៅថ្ងៃសុក្រនេះ បានឲ្យដឹងថា ភ្លៀងមូសុងវស្សា បានសម្លាប់មនុស្សជាង ៩០០នាក់ នៅទូទាំងប្រទេសប៉ាគីស្ថាន ចាប់តាំងពីចុងខែមិថុនារហូតមក ។

បម្រែបម្រួលអាកាសធាតុ បានធ្វើឲ្យទឹកជំនន់កាន់តែអាក្រក់ទៅនៅប្រទេសប៉ាគីស្ថាន ពេលដែលភ្លៀងធ្លាក់ខ្លាំង បណ្តាលឲ្យទឹកទន្លេរឡើងប្រៀបច្រាំង ប៉ុន្តែក្រុមអ្នករិះគន់ បានដាក់ការស្តីបន្ទោសផងដែរលើកង្វះខាតការវិនិយោគរបស់រដ្ឋាភិបាលលើការកាត់បន្ថយគ្រោះមហន្តរាយ ដូចជាប្រព័ន្ធប្រកាសអាសន្នល្អប្រសើរជាងនេះ និងហេដ្ឋារចនាសម្ព័ន្ធជាដើម ។

ទឹកជំនន់ដែលបានបំផ្លិចបំផ្លាញតំបន់កសិកម្ម និងផ្ទះសម្បែងប្រជាពលរដ្ឋ បានធ្វើឲ្យប្រជាពលរដ្ឋមានការខកចិត្តជាខ្លាំង ក្នុងនោះ ៤០ភាគរយនៃពួកគេរស់នៅក្រោមបន្ទាត់ក្រីក្រ ។

ប្រជាពលរដ្ឋរស់នៅក្នុងតំបន់រងផលប៉ះពាល់ខ្លាំងបំផុតនៅខេត្ត Punjab និយាយប្រាប់ BBCថា គ្រួសារជាច្រើន បានសម្រេចចិត្តបន្តស្នាក់នៅក្នុងផ្ទះ ដើម្បីការពារទ្រព្យសម្បត្តិរបស់ពួកគេ បើទោះបីជាមានហានិភ័យខ្ពស់នៃទឹកជំនន់ក៏ដោយ ។

ក្រុមជួយសង្រ្គោះបានធ្វើដំណើរពីផ្ទះមួយទៅកាន់ផ្ទះមួយទៀត ដើម្បីជម្លៀសអ្នកភូមិ និងសត្វចិញ្ចឹមរបស់ពួកគេតាមទូក ប៉ុន្តែវិធីសាស្រ្តបែបនេះ ប្រឈមហានិភ័យផងដែរសម្រាប់ពួកគេ ពេលដែលទូកតូចៗត្រូវទប់ទល់នឹងចរន្តទឹកហូរខ្លាំង ។

គួរឲ្យដឹងថា មនុស្ស ៩នាក់ បានស្លាប់កាលពីថ្ងៃអង្គារ ក្រោយទូកជួយសង្រ្គោះដឹកជនរងគ្រោះទឹកជំនន់ បានក្រឡាប់នៅក្នុងទន្លេ Indus។ កាលពីរយៈប៉ុន្មានថ្ងៃមុននេះ មនុស្ស ៥នាក់ បានស្លាប់នៅក្នុងឧបទ្ទេវហេតុស្រដៀងគ្នានៅតំបន់ជាយក្រុង Jalalpur Pirwala ៕