កំពង់ឆ្នាំង៖ កសិករខ្លះនៅក្នុងភូមិបឹងលាជ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បានប្រាប់ពីវិធីសន្សំសំចៃការចំណាយប្រចាំ និងមានសុខភាពល្អសម្រាប់ក្រុមគ្រួសារ គឺការដាំបន្លែ និងចិញ្ចឹមត្រី ជាលក្ខណៈគ្រួសារតាមបែបធម្មជាតិ។

កសិករម្នាក់ឈ្មោះ ចក់ ធឿន រស់នៅភូមិបឹងលាជ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង បានឱ្យដឹងថា រយៈពេល៦ឆ្នាំមកហើយ ដែលលោកបានចាប់យកមុខរបរចិញ្ចឹមត្រីអណ្ដែង​ជា​លក្ខណៈគ្រួសារ ក្នុងស្រះប្លាស្ទិកតែពីរកូនស្រះតូចៗតែប៉ុណ្ណោះ អាចផ្គត់ផ្គង់ជីវភាពគ្រួសារបាន​ពេញមួយឆ្នាំគួបផ្សំ នឹងការដាំដុះបន្លែ និងចិញ្ចឹមមាន់ខ្លះទៀត គឺមិនបាច់ទៅរកទិញត្រីសាច់នៅ​ទីផ្សារឡើយ​ញឹកញាប់ឡើយ។

កសិកររូបនេះ បានឲ្យដឹងទៀតថា ការចិញ្ចឹមត្រីអណ្ដែងក្នុងស្រះប្លាស្ទិក តាមបែបធម្មជាតិ​ចំណាយ​ពេលប្រមាណបីខែ គឺនៅពេលដែលត្រី ចំនួនចាប់ពី៥ទៅ៧ក្បាល ​មានទម្ងន់មួយគីឡូក្រាម អាច ចាប់លក់បានហើយ និងបានថ្លៃពី៨ពាន់ ទៅ១ម៉ឺនរៀល ក្នុងមួយគីឡូក្រាម។

ដោយឡែក ការចិញ្ចឹមត្រីដោយឱ្យចំណីផលិត គឺពិតជាឆាប់ធំធាត់ជាងពិតមែន​ តែសាច់ត្រី មិនសូវ​មាន​រសជាតិទេ និងមិនមានសុវត្ថិភាពចំពោះសុខភាពនោះឡើយ ។

កសិករ ចក់ ធឿន បានអំពាវនាវដល់ប្រជាកសិករទាំងឡាយ កុំទុកដីឱ្យនៅទំនេរ ​សូម​សាកល្បង ចិញ្ចឹមត្រីអណ្តែងក្នុងស្រះប្លាស្ទិក ​ពិតមិនលំបាកឡើយ ​ដែល​អាច​ផ្គត់ផ្គង់​ជីវភាព​ប្រចាំថ្ងៃបានល្អ ជាពិសេសការបរិភោគត្រីឱ្យចំណីធម្មជាតិ ​និង​បន្លែ​សុវត្ថិភាព គឺ​ពិតជា​ផ្តល់​សុខភាព​ល្អ​ដល់​ក្រុម​គ្រួសារ​យ៉ាងពិតប្រាកដ៕ អត្ថបទ៖ ហុង វាស្នា