នាយករដ្ឋមន្ត្រីប៉ូឡូញ លោក Donald Tusk បាននិយាយនៅថ្ងៃសុក្រ (ទី១២ ខែកញ្ញា) នេះថា ការលុកលុយរបស់យានដ្រូន ក្នុងសប្តាហ៍នេះ ចូលទៅក្នុងដែនអាកាសរបស់ប្រទេសរបស់លោក មិនមែនជាការធ្វើឡើងដោយមានកំហុសឆ្គងរបស់រុស្ស៊ីនោះឡើយ បើទោះជាប្រធានាធិបតីអាមេរិក លោក Donald Trump បានលើកឡើងថា ហេតុការណ៍នេះអាចកើតឡើងដោយចៃដន្យក៏ដោយ។

លោក Tusk បានរៀបរាប់នៅលើបណ្ដាញសង្គម X ថា៖ «យើងក៏ប្រាថ្នាចង់ឲ្យការវាយប្រហារដោយយានដ្រូនមកលើប៉ូឡូញ គឺគ្រាន់ជាកំហុសឆ្គងមួយប៉ុណ្ណោះ។ ប៉ុន្តែវាមិនមែនបែបនោះទេ។ ហើយយើងដឹងច្បាស់»។

គួរបញ្ជាក់ថា កាលពីព្រឹកថ្ងៃពុធ ប្រទេសប៉ូឡូញបានបាញ់ទម្លាក់យានដ្រូន នៅក្នុងដែនអាកាសរបស់ខ្លួន ដោយមានការគាំទ្រយន្តហោះយោធាពីសម្ព័ន្ធមិត្តណាតូរបស់ខ្លួន ដោយនេះជាលើកដំបូងដែលសមាជិកនៃសម្ព័ន្ធមិត្តយោធាលោកខាងលិចមួយនេះ ត្រូវបានគេដឹងថា បានបាញ់ទម្លាក់អាវុធបែបនេះ ក្នុងអំឡុងពេលមានសង្គ្រាមរបស់រុស្ស៊ី នៅអ៊ុយក្រែន។

នៅព្រឹកថ្ងៃសុក្រ អនុរដ្ឋមន្ត្រីការពារជាតិ លោក Cezary Tomczyk ក៏បានធ្វើអត្ថាធិប្បាយ ជុំវិញការលើកឡើងរបស់លោក Trump ផងដែរ។ លោកបានប្រាប់ទូរទស្សន៍ក្នុងស្រុក Polsat News ថា៖ «ខ្ញុំគិតថា នេះគឺជាសារដែលគួរតែទៅដល់ប្រធានាធិបតី Trump នៅថ្ងៃនេះ នោះគឺថា មិនមានការសង្ស័យពីការមានកំហុសឆ្គងនឡើយ។ នេះគឺជាការវាយប្រហារដោយចេតនារបស់រុស្ស៊ី»។

តាមសំណើរបស់ប្រទេសប៉ូឡូញ ក្រុមប្រឹក្សាសន្តិសុខអង្គការសហប្រជាជាតិ (UNSC) នឹងជួបប្រជុំគ្នានៅទីក្រុងញូវយ៉ក សហរដ្ឋអាមេរិក នាថ្ងៃសុក្រនេះ។ ក្រសួងការបរទេសប៉ូឡូញ បានឲ្យដឹងថា កិច្ចប្រជុំនេះនឹងចាប់ផ្តើមនៅម៉ោង ៣រសៀល ម៉ោងក្នុងស្រុក (ត្រូវនឹងម៉ោង ៧យប់ ម៉ោងសកល)៕