ភ្នំពេញ ៖ ឯកឧត្តមរដ្ឋមន្ត្រី ហួត ហាក់ រដ្ឋមន្ត្រីក្រសួងទេសចរណ៍ បានថ្លែងថា ការរៀបចំបង្គន់អនាម័យសម្រាប់សាធារណជន ប្រកបដោយស្ដង់ដា ផាសុកភាព និងរក្សាបាននូវបរិស្ថានស្រស់ស្អាត គឺមានភាពចាំបាច់មិនអាចខ្វះបាន ដើម្បីរួមចំណែកក្នុងការបង្កើនភាពទាក់ទាញ និងជំរុញកំណើនទេសចរណ៍កម្ពុជា។

ការថ្លែងនេះ ធ្វើឡើងក្នុងឱកាស ឯកឧត្ដម អញ្ជើញជាគណៈអធិបតីក្នុងពិធីបើកសិក្ខាសាលាផ្សព្វផ្សាយស្តង់ដាបង្គន់សាធារណៈកម្ពុជាស្អាត និងផ្សព្វផ្សាយចលនាប្រឡងប្រណាំង «បង្គន់សាធារណៈកម្ពុជាស្អាត ឆ្នាំ២០២៥-២០២៦» សំដៅពង្រឹងគុណភាពសេវាកម្មទេសចរណ៍ ដើម្បីបង្កើនភាពងាយស្រួល សុវត្ថិភាព ផាសុកភាព ជូនភ្ញៀវទេសចរជាតិ និងអន្តរជាតិ នៅទីស្តីការក្រសួងទេសចរណ៍ នាថ្ងៃទី១២ ខែកញ្ញា ឆ្នាំ២០២៥ នេះ ដោយមានស្ថាប័ន និងវិស័យពាក់ព័ន្ធចូលរួម ២១៣រូប។

ឯកឧត្តម ហួត ហាក់ បានមានប្រសាសន៍បញ្ជាក់បន្ថែមទៀតថា ការរៀបចំបង្គន់អនាម័យសាធារណៈប្រកបដោយស្ដង់ដានេះ គឺបានផ្ដល់អត្ថប្រយោជន៍ជាច្រើនទៅគ្រប់ភាគីពាក់ព័ន្ធទាំងអស់៖ ចំពោះអ្នកប្រើប្រាស់ដែលជាសាធារណជន ភ្ញៀវទេសចរជាតិ អន្តរជាតិ (ទទួលបានផាសុកភាព និងភាពងាយស្រួល), ចំពោះម្ចាស់អាជីវកម្ម (ទទួលបានអតិថិជនគាំទ្រ និងវាយតម្លៃការផ្ដល់សេវាកម្មល្អ), ក៏ដូចជាសង្គមជាតិកម្ពុជាទាំងមូល (គឺការលើកកម្ពស់សុខុមាលភាពប្រជាជន និងបង្ហាញពីសេចក្ដីថ្លៃថ្នូរ ព្រមទាំង សីលធម៌ល្អ)។

ជាមួយគ្នានេះដែរ ឯកឧត្តមរដ្ឋមន្រ្តី បានជម្រាបជូនថា នៅកិច្ចប្រជុំថ្នាក់រដ្ឋមន្រ្តីទេសចរណ៍អាស៊ានលើកទី២៨ និងកិច្ចប្រជុំពាក់ព័ន្ធ នៅទីក្រុងចូហូ ប្រទេសម៉ាឡេស៊ី កាលពីថ្ងៃទី១៧ ដល់ថ្ងៃទី២១ ខែមករា ឆ្នាំ២០២៥ កន្លងទៅនេះ ព្រះរាជាណាចក្រកម្ពុជាមានមោទនភាព ដោយទទួលបានពានរង្វាន់ស្តង់ដាទេសចរណ៍អាស៊ាន ចំនួន២០ ក្នុងនោះ កម្ពុជាក៏ទទួលបានពានរង្វាន់ស្តង់ដាបង្គន់សាធារណៈអាស៊ានចំនួន៥ ផងដែរ។

ឯកឧត្តមរដ្ឋមន្ត្រី ហួត ហាក់ បានបញ្ជាក់ថា រាជរដ្ឋាភិបាលកម្ពុជា តែងតែគិតគូរ និងយកចិត្តទុកដាក់ខ្ពស់លើសុខុមាលភាពរបស់ប្រជាពលរដ្ឋ ក៏ដូចជាភ្ញៀវទេសចរទាំងអស់ដែលមកកម្សាន្តនៅកម្ពុជា តាមរយៈការលើកកម្ពស់ និងការធ្វើឱ្យប្រសើរឡើងនូវគុណភាពសេវាកម្មទេសចរណ៍ជាប់ជាប្រចាំ។ ជាក់ស្ដែង ក្រសួងទេសចរណ៍បានដាក់ចេញនូវយុទ្ធនាការ «ទីក្រុងស្អាត រមណីយដ្ឋានស្អាត សេវាល្អ បដិសណ្ឋារកិច្ចល្អ» ដែលមិនត្រឹមតែចូលរួមដល់ការលើកកម្ពស់គុណភាពសេវាកម្មទេសចរណ៍ និងផលិតផលទេសចរណ៍នៅតាមបណ្តាទីក្រុង និងទីប្រជុំជននានាប៉ុណ្ណោះទេ ថែមទាំងចូលរួមលើកកម្ពស់កិត្តិនាមកម្ពុជា និងឧត្តមភាពប្រកួតប្រជែងរបស់ទេសចរណ៍កម្ពុជា នៅក្នុងតំបន់ និងសកលលោក តាមរយៈការចូលរួមប្រកួតប្រជែងដណ្ដើមជ័យលាភីស្ដង់ដាកម្រិតអន្តរជាតិ៕