ក្រុមហាម៉ាសនិយាយថា ការវាយប្រហាររបស់អ៊ីស្រាអែលដែលមានគោលដៅលើក្រុមមេដឹកនាំរបស់ខ្លួននៅទីក្រុង Doha ប្រទេសកាតា កាលពីថ្ងៃអង្គារ នឹងពុំផ្លាស់ប្តូរលក្ខខណ្ឌក្រុមជីវពលប៉ាឡេស្ទីនមួយនេះ លើការបញ្ចប់សង្រ្គាមនៅហ្កាហ្សានោះឡើយ ។

លោក Fawzi Barhoum គឺជាមន្រ្តីមួយរូបរបស់ក្រុមហាម៉ាស និយាយនៅក្នុងសុន្ទរកថាបញ្ចេញតាមកញ្ចក់ទូរទស្សន៍កាលពីថ្ងៃព្រហស្បតិ៍ថា ការវាយប្រហារនេះ មានគោលដៅលើគណៈប្រតិភូចរចារបស់ខ្លួន ខណៈពួកគេពិភាក្សាលើសំណើបទឈប់បាញ់របស់ប្រធានាធិបតីសហរដ្ឋអាមេរិកលោក Donald Trump ។

អ្នកនាំពាក្យរូបនេះ បានអំពាវនាវឲ្យក្រុមមេដឹកនាំអារ៉ាប់ ចាត់វិធានការស្របច្បាប់ និងផ្នែកនយោបាយប្រឆាំងនឹងអ៊ីស្រាអែល បន្ទាប់ពីការវាយប្រហារដែលមានគោលដៅលើទីស្នាក់ការកណ្តាលចលនាតស៊ូមួយនេះ នៅក្នុងទីក្រុង Doha ។

អ្នកដែលត្រូវបានសម្លាប់នៅក្នុងការវាយប្រហារខាងលើ រួមមានកូនប្រុសរបស់ប្រធានក្រុមហាម៉ាសនិរទេសខ្លួន និងជាអ្នកចរចាជាន់ខ្ពស់មួយរូប គឺលោក Khalil Al-Hayya, Hammam Al-Hayya ជាមួយសមាជិកសន្តិសុខក្រុមហាម៉ាសលោក Jihad Labbad, Abdullah Abdul Wahid, Moamen Hassouna និងលោក Ahmed Abdul Malik ។

ពិធីបុណ្យសពត្រូវបានចូលរួមផងដែរដោយព្រះចៅអធិរាជកាតា ព្រះអង្គម្ចាស់ Sheikh Tamim bin Hamad Al Thani ដែលបានធ្វើពិធីបួងសួង និងត្រូវបានគេមើលឃើញលួងលោមសាច់ញាតិអ្នកស្លាប់ ។

អ៊ីស្រាអែលប៉ុនប៉ងសម្លាប់ក្រុមមេដឹកនាំនយោបាយក្រុមហាម៉ាសជាមួយនឹងការវាយប្រហារលើរដ្ឋធានីកាតាកាលពីថ្ងៃអង្គារ ជាការបង្កើនសកម្មភាពយោធាដែលសហរដ្ឋអាមេរិករៀបរាប់ថាជាការវាយប្រហារឯកតោភាគី និងមិនជំរុញផលប្រយោជន៍អាមេរិក និងអ៊ីស្រាអែលនោះទេ ៕