មន្ត្រីរាជការចូលនិវត្តន៍នេប៉ាល់ លោក Dhruba Shrestha បានឆ្លងកាត់ភាពចលាចលជាច្រើនទស្សវត្សរ៍មកហើយ រាប់ចាប់ពីសង្គ្រាមស៊ីវិល រហូតដល់ភាពចលាចលផ្នែកនយោបាយ ប៉ុន្តែបុរសវ័យ ៧៦ឆ្នាំរូបនេះមិននិយាយអ្វីទាំងអស់ ពាក់ព័ន្ធនឹងហេតុការណ៍កន្លងមកទាំងនោះ បើប្រៀបធៀបទៅនឹងអំពើហិង្សាដែលបានគ្របដណ្ដប់លើប្រទេសតំបន់ភ្នំហិមាល័យមួយនេះ នៅក្នុងសប្តាហ៍នេះ។

ខណៈដែលកងទ័ពបានលុបចោលបម្រាមគោចររយៈពេលខ្លី នៅក្នុងទីក្រុង Kathmandu លោក Shrestha បាននិយាយថា៖ «ខ្ញុំបានឃើញអំពើហិង្សា តាំងពីនៅជំនាន់ជាសិស្សម្ល៉េះ ប៉ុន្តែមិនដែលប្រទះការបះបោរបែបនេះឡើយ»។

លោក Shrestha បានបន្ថែមថា៖ «នរណាម្នាក់នឹងមិនភ័យខ្លាចនោះ ពេលជួបស្ថានភាពបែបនេះ។ គ្មាននរណាម្នាក់អាចស្រមៃដល់ស្ថានការណ៍នេះឡើយ»។

គួរបញ្ជាក់ថា ប្រទេសនេប៉ាល់បានធ្លាក់ចូលទៅក្នុងភាពចលាចល បន្ទាប់ពីនគរបាលបានបើកការបាញ់ប្រហារទៅលើក្រុមបាតុករវ័យក្មេង ដែលតវ៉ាប្រឆាំងអំពើពុករលួយ ដោយបង្កឲ្យមានវឹកវរទូទាំងប្រទេសកាលពីថ្ងៃទី៩ ខែកញ្ញា។ ក្រុមបាតុករបានដុតរដ្ឋសភា ការិយាល័យរដ្ឋាភិបាល និងប្រធានាធិបតី រួមទាំងសណ្ឋាគារ Hilton ដែលទើបនឹងបើកដំណើរការថ្មី មុនពេលទាហានដណ្តើមគ្រប់គ្រងបានវិញនូវផ្លូវនានា នៅថ្ងៃបន្ទាប់។

នៅថ្ងៃសុក្រ (ទី១២ ខែកញ្ញា) នេះ ផ្លូវនានាក្នុងរដ្ឋធានីមានភាពស្ងប់ស្ងាត់យ៉ាងខ្លាំង ដែលមានសុទ្ធតែរថយន្តដែលឆេះម៉ត់ខ្ទេច ខណៈដែលទាហានបានយាមកាមនៅពិនិត្យប៉ុស្តិ៍ត្រួតពិនិត្យ ជុំវិញអគាររដ្ឋាភិបាលដែលត្រូវបានដុត។ មនុស្សយ៉ាងហោចណាស់ ៥១នាក់ ត្រូវបានសម្លាប់នៅទូទាំងប្រទេសមានប្រជាជនចំនួន ៣០លាននាក់ ដែលជាអំពើហិង្សាដ៏អាក្រក់បំផុតលើកដំបូង ចាប់តាំងពីបញ្ចប់សង្រ្គាមស៊ីវិល និងលុបបំបាត់របបរាជានិយមក្នុងឆ្នាំ២០០៨។

ប្រធានាធិបតីនេប៉ាល់ និងមេទ័ព កំពុងស្វែងរកមេដឹកនាំបណ្តោះអាសន្នដែលមានការឯកភាពគ្នា ដើម្បីបំពេញភាពទំនេរផ្នែកនយោបាយនេះ។ ការខ្វែងគំនិតគ្នា រវាងក្រុមគូប្រជែង នៅតែមានដដែល បើទោះជាលោកស្រី Sushila Karki វ័យ ៧៣ឆ្នាំ ដែលជាប្រមុខក្រសួងយុត្តិធម៌ស្ត្រីទី ១ របស់ប្រទេសនេប៉ាល់ គឺជាបេក្ខជននាំមុខគេក៏ដោយ៕