នៅថ្ងៃសុក្រនេះ ប្រជានេសាទហ្វីលីពីន បានព្រមានថា ការបៀតបៀននៅថ្មប៉ប្រះទឹក Scarborough អាចនឹងកាន់តែអាក្រក់ទៅ បើសិនជាចិនជំរុញផែនការកសាងតំបន់អភិរក្សធម្មជាតិនៅដែនទឹកជម្លោះក្នុងសមុទ្រចិនខាងត្បូងមួយនេះ ។

លោក Mariano Cardenio គឺជាអ្នកនេសាទវ័យ ៥៧ឆ្នាំម្នាក់មកពីឆកសមុទ្រ Subic និយាយថា សូម្បីតែពេលបច្ចុប្បន្ន មានការបៀតបៀនរួចទៅហើយ តើនឹងមានការបៀតបៀនអ្វីបន្ថែមទៀត ពេលដែលពួកគេចាប់ផ្តើមកសាងតំបន់អភិរក្សធម្មជាតិរួចហើយនោះ? លោកបាននិយាយបន្ទផងដែរថា ការចូលដល់កន្លែងនេសាទបែបប្រពៃណីរបស់ពួកគេ នឹងត្រូវរឹតត្បិតបន្ថែមទៀត ។

លោក Cardenio បន្តថា វាគឺជាកម្មសិទ្ធិរបស់ហ្វីលីពីន មិនមែនជាកម្មសិទ្ធិរបស់ពួកគេនោះទេ ។ បើសិនជាអ្នកមើលឲ្យច្បាស់ ពេលដែលកន្លែងអភិរក្សធម្មជាតិខិតកាន់តែជិតពួកយើង វានឹងស្ថិតនៅក្នុងដែនដីរបស់ពួកយើង ។

នៅក្នុងសប្តាហ៍នេះ ក្រុមប្រឹក្សារដ្ឋចិន បានអនុម័តបង្កើតតំបន់អភិរក្សាធម្មជាតិជាតិនៅថ្មប៉ប្រះទឹក Scarborough ដោយពួកគេចាត់ទុកវាថាជាការធានាដ៏សំខាន់មួយ ក្នុងការការពារប្រព័ន្ធអេកូឡូស៊ីកោះ ។

ក្រសួងការបរទេសហ្វីលីពីននិយាយថា ការធ្វើបែបនេះបំពានយ៉ាងច្បាស់លើសិទ្ធិ និងអត្ថប្រយោជន៍ទីក្រុងម៉ានីល ដោយពួកគេបញ្ជាក់ឡើងវិញថា តំបន់ថ្មប៉ប្រះទឹក គឺជាផ្នែកមួយដ៏សំខាន់ និងយូរអង្វែងប្រទេសរបស់ពួកគេ ។ 

សូមបញ្ជាក់ថា ថ្មប៉ប្រះទឹក Scarborough ដែលចិនហៅឈ្មោះថាកោះ Huangyan ហើយហ្វីលីពីនហៅឈ្មោះថា តំបន់ថ្មប៉ប្រះទឹក Panatag ស្ថិតក្រោមការគ្រប់គ្រងរបស់ទីក្រុងប៉េកាំង ចាប់តាំងពីឆ្នាំ ២០១២ រហូតមក ។ ទីនេះសម្បូរត្រី និងស្ថិតនៅជិតផ្លូវដឹកជញ្ជូនតាមសមុទ្រដ៏សំខាន់មួយ ។

កាលពីឆ្នាំ ២០១៦ តុលាការមជ្ឈត្តការអចិន្រ្តៃយ៍នៅក្រុងឡាអេ បានសម្រេចថា ការប្រកាសសិទ្ធិសមុទ្រចិនខាងត្បូងដ៏ទូលំទូលាយរបស់ចិន គ្មានមូលដ្ឋាននៅក្នុងច្បាប់អន្តរជាតិនោះទេ គឺជាសេចក្តីសម្រេចមួយដែលទីក្រុងប៉េកាំងច្រានចោល ៕