យោងតាមរបាយការណ៍របស់អង្គការសហប្រជាជាតិបានឲ្យដឹងថា ប្រទេសកូរ៉េខាងជើងបាន​រឹត​បន្តឹងលើ​ប្រជាជនរបស់ខ្លួនក្នុងរយៈមួយទសវត្សរ៍កន្លងទៅនេះ ដោយប្រហារជីវិតប្រជាជន​សម្រាប់​សកម្មភាពដូចជាការចែករំលែករឿងឬព្រឹត្តិការណ៍នៅទូរទស្សន៍បរទេស។

ការិយាល័យសិទ្ធិមនុស្សរបស់អង្គការសហប្រជាជាតិបាននិយាយកាលពីថ្ងៃសុក្រថា ការដាក់គំនាបរដ្ឋដែលប្រើបច្ចេកវិទ្យាក្រោមត្រកូលគីម គ្រប់គ្រងអំណាចផ្តាច់ការរយៈពេល៧ទសវត្សរ៍មកនោះ បានធ្វើឲ្យមាន«ទុក្ខលំបាក ការគាបសង្កត់ និងការភ័យខ្លាចចេះតែកើនឡើង» ក្នុង១ទសវត្សរ៍ចុងក្រោយនេះ។ របាយការណ៍របស់ទីភ្នាក់ងារបានសន្និដ្ឋានថា «គ្មានប្រជាជនផ្សេងទៀតស្ថិតនៅក្រោមការរឹតត្បឹតបែបនេះទេនៅលើពិភពលោកនាពេលបច្ចុប្បន្ន» ដែលផ្អែកលើការសម្ភាសន៍ជាមួយសាក្សី និងជនរងគ្រោះជាង៣០០នាក់ ដែលបានភៀសខ្លួនចេញពីប្រទេសនេះ និងរាយការណ៍ពីការលុបបំបាត់សេរីភាព។

អ្នករត់គេចខ្លួនម្នាក់បានរៀបរាប់ក្នុងរបាយការណ៍ថា «ដើម្បីរារាំង ភ្នែកនិងត្រចៀករបស់ប្រជាជន ពួកគេបានពង្រឹងដោយការបង្រ្កាប។ វាគឺជាទម្រង់មួយនៃការគ្រប់គ្រងក្នុងគោលបំណងលុបបំបាត់សូម្បីតែសញ្ញាតូចបំផុតនៃការមិនពេញចិត្ត ឬការត្អូញត្អែរ»។ លោក James Heenan ប្រធានការិយាល័យសិទ្ធិមនុស្សអង្គការសហប្រជាជាតិប្រចាំប្រទេសកូរ៉េខាងជើង បាននិយាយក្នុងសន្និសីទសារព័ត៌មាននៅទីក្រុងហ្សឺណែវថា ចំនួននៃការប្រហារជីវិតសម្រាប់ទាំងឧក្រិដ្ឋកម្មនិងនយោបាយ បានកើនឡើងចាប់តាំងពីការរឹតបន្តឹងសម័យជំងឺរាតត្បាតកូវីដ-១៩។ លោកបាននិយាយបន្ថែមថា មនុស្សមួយចំនួនដែលពុំបានបញ្ជាក់ត្រូវបានប្រហារជីវិតក្រោមច្បាប់ថ្មីដែលដាក់ទោសប្រហារជីវិតសម្រាប់ការចែករំលែករឿងរ៉ាវសនៅទូរទស្សន៍បរទេស រួមទាំង K-Dramas ដ៏ពេញនិយមពីប្រទេសកូរ៉េខាងត្បូងផងដែរ៕