ភ្នំពេញ៖ ប្រធាន​អាស៊ាន​ឆ្នាំ​២០២២ សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានស្នើសុំយ៉ាងទទួចជាថ្មីម្តងទៀតដល់គ្រប់ភាគីជម្លោះទាំងអស់​នៅប្រទេសមីយ៉ាន់ម៉ា ឱ្យ​បញ្ឈប់អំពើហិង្សារ​បន្ទាន់ ហើយ​រក្សា​ភាព​អត់​ធ្មត់​ជា​អតិប្បរមា ខណៈសម្តេចមានការព្រួយបារម្ភចំពោះការបាញ់គ្នានៅប្រទេសនេះ ក្រោយដំណើរទស្សនកិច្ចរបស់សម្តេចកាលពីដើមខែមករា​កន្លងទៅនោះ។

ប្រមុខ​រាជ​រដ្ឋាភិបាល​កម្ពុជា បាន​ស្នើ​សុំ​បែប​នេះ​​នៅក្នុងកិច្ចប្រជុំតាមរយៈវីដេអូពីចម្ងាយ​រវាងសម្តេច និង​លោក មីន អោងឡាំង មេដឹកនាំយោធាមីយ៉ាន់ម៉ា នារសៀលថ្ងៃទី២៦ ខែមករា​នេះ។

ថ្លែងប្រាប់អ្នកយកព័ត៌មានបន្ទាប់ពីកិច្ចប្រជុំនោះ ឯកឧត្តម កៅ គឹមហួន រដ្ឋមន្រ្តីប្រតិភូអមនាយករដ្ឋមន្រ្តី បានលើកឡើងថា នៅក្នុងកិច្ចប្រជុំនោះ សម្តេចតេជោ ហ៊ុន សែន និងភាគីមីយ៉ាន់ម៉ា បានពិភាក្សា​គ្នាជាច្រើន ដើម្បីផលប្រយោជន៍ និងសន្តិភាពនៅប្រទេសមីយ៉ាន់ម៉ា និងប្រជាជនមីយ៉ាន់ម៉ា។

ឯកឧត្តម កៅ គឹមហួន បានឱ្យ​ដឹង​ទៀតថា នៅក្នុងកិច្ចសន្ទនានេះ សម្តេចតេជោ ហ៊ុន សែន បានសម្តែងការព្រួយបារម្ភយ៉ាងខ្លាំងចំពោះអំពើ​ហិង្សា​ប្រដាប់​អាវុធ​នៅប្រទេសនេះ ហើយស្នើដល់គ្រប់ភាគីទាំងអស់ ឱ្យ​មានភាពអត់ធ្មត់ និងទទួលយកនូវការចរចារគ្នាដោយសន្តិវិធី។

បើតាមឯកឧត្តម កៅ គឹមហួន សម្តេចតេជោ ហ៊ុន សែន ក៏លើក​ឡើង​នូវ​សំណើ​​មួយ​ចំនួន​ទៀត​ដល់លោក មីន អោងឡាំង ផង​ដែរ ក្នុងនោះ សម្ដេច​តេជោ​ស្នើដល់លោក មីន អោងឡាំង ឲ្យខិតខំអនុវត្តនូវកិច្ចព្រមព្រៀងជាឯកឆ័ន្ទចំនួន ៥ចំណុច ដែលមេដឹកនាំ​រដ្ឋាភិបាលអាស៊ាន បានឯកភាពគ្នា​កាលពីខែមេសា ឆ្នាំ២០២១កន្លងទៅ។

ប្រធាន​អាស៊ាន​ឆ្នាំ​២០២២ ក៏​បាន​ស្នើទៅ​លោក មីន អោងឡាំង ឱ្យ​បង្កលក្ខណៈធ្វើយ៉ាងណាឲ្យប្រេសិតពិសេសរបស់ប្រធាន​អាស៊ាន បានទៅបំពេញ​ទស្សនកិច្ចនៅមីយ៉ាន់ម៉ាជាលើកដំបូងនៅពេលសមស្របខាងមុខនេះ។

ជាពិសេសទៅទៀតនោះ សម្តេចតេជោ ហ៊ុន សែន ក៏បានអញ្ជើញលោក មីន អោងឡាំង មេដឹកនាំរបបយោធាមីយ៉ាន់ម៉ា ឱ្យ​ចូលរួមជាមួយថ្នាក់ដឹកនាំអាស៊ានផ្សេងទៀត ក្នុងការផ្តល់ជំនួយមនុស្សធម៌​ដល់ប្រជាពលរដ្ឋមីយ៉ាន់ម៉ាដែលកំពុងត្រូវការបំផុតនោះ។

នេះ​គឺ​ជា​លើក​ដំបូង​ហើយ​ដែល​ប្រមុខ​ដឹកនាំ​កម្ពុជា​ក្នុង​នាម​ជា​ប្រធាន​អាស៊ាន បាន​ជជែក​តាម​ប្រព័ន្ធ​វីដេអូ​ពី​ចម្ងាយ​ជាមួយ​មេដឹកនាំ​យោធា​ភូមា បន្ទាប់​ពី​សម្ដេច​តេជោ ហ៊ុន សែន បាន​ដឹកនាំ​ប្រតិភូ​ជាន់​ខ្ពស់​កម្ពុជា ទៅ​បំពេញ​ទស្សនកិច្ច​នៅ​មីយ៉ាន់ម៉ា​កាល​ពី​ថ្ងៃ​ទី​០៧ ខែ​មករា​នេះ៕ អត្ថបទ៖ សុធី