ក្រសួងសន្តិសុខមាតុភូមិ និងអ្នកតំណាងរដ្ឋក្នុងតំបន់បាននិយាយថា ភ្នាក់ងារអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក បានបាញ់សម្លាប់បុរសម្នាក់កាលពីថ្ងៃសុក្រ ទី១២ ខែកញ្ញា ខណៈមន្រ្តីបានព្យាយាមចាប់ខ្លួនបុរសនោះនៅតំបន់ជាយក្រុង Chicago ។

ក្រសួងសន្តិសុខមាតុភូមិ និយាយនៅក្នុងសេចក្តីថ្លែងការណ៍ថា មន្រ្តីទីភ្នាក់ងារអនុវត្តច្បាប់អន្តោប្រវេសន៍ និងគយរបស់សហរដ្ឋអាមេរិក(ICE) បានឲ្យរថយន្តឈប់ដើម្បីចាប់ខ្លួនលោក Silverio Villegas-Gonzalez នៅពេលលោកបានបើករថយន្តចូលទៅកាន់មន្រ្តីអនុវត្តច្បាប់។

យោងតាមសេចក្តីថ្លែងការណ៍បានឱ្យដឹងថា មន្ត្រី ICE ម្នាក់បានបាញ់ លោក Villegas-Gonzalez បន្ទាប់ពីត្រូវបានកៀរដោយរថយន្តរបស់លោក Villegas-Gonzalez ។

មន្ត្រីដែលមិនត្រូវបានបញ្ចេញឈ្មោះម្នាក់បានរងរបួស និងស្ថិតក្នុងស្ថានភាពមានស្ថិរភាព។ ក្រសួងសន្តិសុខមាតុភូមិ បាននិយាយថាមន្រ្តីបានប្រើប្រាស់ «កម្លាំងសមស្រប» និងបាននិយាយថា លោក Villegas-Gonzalez មានប្រវត្តិនៃការបើកបរមិនប្រុងប្រយ័ត្ន។

រដ្ឋបាល លោក Trump បាននិយាយកាលពីថ្ងៃចន្ទថា រដ្ឋបាលនេះបានចាប់ផ្តើមសកម្មភាពអនុវត្តច្បាប់អន្តោប្រវេសន៍នៅទីក្រុង Chicago និងផ្នែកផ្សេងទៀតនៃរដ្ឋ Illinois។