ប្រព័ន្ធផ្សព្វផ្សាយរដ្ឋ KCNA នៅថ្ងៃសៅរ៍ (ទី១៣ ខែកញ្ញា) នេះ បានរាយការណ៍ថា មេដឹកនាំកូរ៉េខាងជើងលោក Kim Jong Un បាននិយាយថា ប្រទេសរបស់លោកនឹងបង្ហាញគោលនយោបាយ ដែលជំរុញទាំងអាវុធនុយក្លេអ៊ែរ និងកម្លាំងយោធាធម្មតា ក្នុងអំឡុងពេលមានកិច្ចប្រជុំដ៏សំខាន់នាពេលខាងមុខរបស់គណបក្សកាន់អំណាច។

ប្រព័ន្ធផ្សព្វផ្សាយ KCNA បានឲ្យដឹងថា នៅពេលដែលទៅត្រួតពិនិត្យមជ្ឈមណ្ឌលស្រាវជ្រាវអាវុធ កាលពីថ្ងៃទី១១ និងទី១២ ខែកញ្ញា លោក Kim បាននិយាយថា «សមាជលើកទី៩ របស់គណបក្សពលករកូរ៉េ នឹងលើកឡើងនូវគោលនយោបាយ ដែលជំរុញក្នុងពេលដំណាលគ្នា ចំពោះការពង្រឹងទាំងកម្លាំងនុយក្លេអ៊ែរ និងកងកម្លាំងប្រដាប់អាវុធធម្មតា ពាក់ព័ន្ធនឹងការពង្រឹងវិស័យការពារជាតិ»។

ប្រព័ន្ធផ្សព្វផ្សាយ KCNA បានបន្ថែមថា នៅថ្ងៃទី១២ ខែកញ្ញានោះ លោក Kim ក៏បានត្រួតមើលសមយុទ្ធបាញ់ប្រហាររបស់យោធាកូរ៉េខាងជើង និងបានត្រួតពិនិត្យការដ្ឋានសាងសង់មន្ទីរពេទ្យផងដែរ។

សកម្មភាពជាបន្តបន្ទាប់របស់លោក Kim នៅក្នុងប្រទេស ធ្វើឡើងបន្ទាប់ពីមាននូវដំណើរទស្សនកិច្ចរបស់លោក នៅទីក្រុងប៉េកាំង កាលពីដើមខែកញ្ញា ដើម្បីចូលរួមព្រឹត្តិការណ៍ពហុភាគីអន្តរជាតិដ៏ធំបំផុតរបស់លោក និងធ្វើកិច្ចប្រជុំជាមួយមេដឹកនាំកំពូលៗ ដូចជាប្រធានាធិបតីចិន លោក Xi Jinping និងប្រធានាធិបតីរុស្ស៊ីលោក Vladimir Putin ជាដើម ដោយនេះជាដំណើរដែលបានលើកកម្ពស់មុខមាត់របស់លោកលើឆាកអន្តរជាតិ។

ទន្ទឹមនឹងនេះ ការអត្ថាធិប្បាយរបស់ប្រព័ន្ធផ្សព្វផ្សាយ KCNA នាថ្ងៃទី១៣ ខែកញ្ញានេះ បានថ្កោលទោសការគ្រោងទុកធ្វើសមយុទ្ធយោធារួមគ្នា នៅសប្តាហ៍ក្រោយ ពីសំណាក់សហរដ្ឋអាមេរិក និងកូរ៉េខាងត្បូង ដោយហៅសមយុទ្ធនេះថា ជា «សមយុទ្ធសង្គ្រាមនុយក្លេអ៊ែរ» ហើយសង្កត់ធ្ងន់ថា វាគឺសមហេតុផល ដែលកូរ៉េខាងជើងបន្តនូវយុទ្ធសាស្ត្រនុយក្លេអ៊ែរ៕