រដ្ឋមន្ត្រីការបរទេស លោក Marco Rubio កាលពីថ្ងៃសុក្រ (ទី១២ ខែកញ្ញា) បាននិយាយថា សហរដ្ឋអាមេរិកឈរជាមួយហ្វីលីពីន ដោយបដិសេធនូវអ្វីដែលលោកបានពណ៌នាថា ជា «ផែនការធ្វើឲ្យមានអស្ថិរភាព» របស់ចិន ចំពោះតំបន់ថ្មប៉ប្រះទឹកមានជម្លោះ នៅក្នុងសមុទ្រចិនខាងត្បូង។

លោក Rubio បានឲ្យដឹងនៅក្នុងសេចក្តីថ្លែងការណ៍មួយថា៖ «ទីក្រុងប៉េកាំងដែលទាមទារតំបន់ថ្មប៉ប្រះទឹក Scarborough ជាតំបន់អភិរក្សធម្មជាតិ គឺជាការប៉ុនប៉ងបង្ខិតបង្ខំមួយផ្សេងទៀត ដើម្បីជំរុញដល់ការអះអាងសិទ្ធិដែនដី និងដែនសមុទ្រដ៏ធំទូលាយ នៅក្នុងសមុទ្រចិនខាងត្បូង ដោយយកប្រៀបលើប្រទេសជិតខាងរបស់ខ្លួន»។

អ្នកនេសាទហ្វីលីពីនបារម្ភថា ផែនការរបស់ទីក្រុងប៉េកាំង ក្នុងការបង្កើតតំបន់អភិរក្សធម្មជាតិ អាចធ្វើឲ្យពួកគេពិបាកធ្វើប្រតិបត្តិការ នៅតំបន់ថ្មប៉ប្រះទឹក ដែលស្ថិតនៅក្រោមការឃ្លាំមើលជាប្រចាំរបស់នាវាចិន។

គួរបញ្ជាក់ថា តំបន់ថ្មប៉ប្រះទឹក Scarborough Shoal ស្ថិតនៅក្នុងតំបន់សេដ្ឋកិច្ចផ្តាច់មុខរបស់ប្រទេសហ្វីលីពីន ប៉ុន្តែបានស្ថិតនៅក្រោមការគ្រប់គ្រងរបស់ទីក្រុងប៉េកាំងតាំងពីឆ្នាំ២០១២។ ប្រទេសចិនបានទាមទារស្ទើរតែទាំងអស់នូវតំបន់នៃសមុទ្រចិនខាងត្បូង ដែលជាផ្លូវទឹកដឹកជញ្ជូនពាណិជ្ជកម្មប្រចាំឆ្នាំមានតម្លៃជាង ៣សែនកោដិលានដុល្លារ បើទោះបីជាមានការទាមទារត្រួតស៊ីគ្នា ដោយហ្វីលីពីន ប្រ៊ុយណេ ម៉ាឡេស៊ី និងវៀតណាមក៏ដោយ។

លោក Rubio បានបញ្ជាក់បន្ថែមថា សកម្មភាពរបស់ចិនបានបន្តធ្វើឲ្យខូចដល់ស្ថិរភាពក្នុងតំបន់ ដោយអំពាវនាវឲ្យទីក្រុងប៉េកាំងគោរពតាមសេចក្តីសម្រេចជាឯកច្ឆន្ទឆ្នាំ២០១៦ របស់តុលាការអាជ្ញាកណ្តាល ដែលថា ប្រទេសចិនបានរារាំងដោយខុសច្បាប់ ចំពោះអ្នកនេសាទហ្វីលីពីន មិនឲ្យចូលនេសាទបែបប្រពៃណីនៅតំបន់ថ្មប៉ប្រះទឹក Scarborough Reef៕