ទីក្រុងមូស្គូ កាលពីថ្ងៃសុក្រ (ទី១២ ខែកញ្ញា) បានបញ្ជាក់ឲ្យដឹងថា កិច្ចចរចាសន្តិភាពជាមួយទីក្រុងគីវ ត្រូវបាន «ផ្អាក» ខណៈដែលប្រធានាធិបតីអ៊ុយក្រែន លោក Volodymyr Zelensky បានព្រមានថា មេដឹកនាំរុស្ស៊ី លោក Vladimir Putin នៅតែមានផែនការ ដើម្បីព្យាយាមដណ្តើមកាន់កាប់ទឹកដីអ៊ុយក្រែនទាំងមូល។

ក្នុងពេលជាមួយគ្នានេះដែរ ប្រធានាធិបតីអាមេរិក លោក Donald Trump បានព្រមានថា លោកបានបាត់ការអត់ធ្មត់យ៉ាងឆាប់រហ័សជាមួយលោក Putin ដែលមិនបានបង្ហាញពីចេតនាបញ្ឈប់ ឬបន្ថយការវាយលុកលើដី ឬការវាយប្រហារយ៉ាងសន្ធាប់តាមអាកាសលើទីក្រុងនានារបស់អ៊ុយក្រែននោះឡើយ។

ឧបសគ្គចុងក្រោយបង្អស់ ដែលរារាំងដល់កិច្ចប្រឹងប្រែងការទូត កើតមានឡើងស្របពេលដែលកងទ័ពរបស់រុស្ស៊ី បានធ្វើសមយុទ្ធយោធាដ៏ធំជាមួយសម្ព័ន្ធមិត្តដ៏សំខាន់របស់ខ្លួន គឺបេឡារុស និងខណៈដែលអង្គការណាតូ បានឲ្យដឹងថា ខ្លួនគ្រោងនឹងពង្រឹងកងកម្លាំងនៅប៉ែកខាងកើតរបស់សម្ព័ន្ធភាព បន្ទាប់ពីយានដ្រូនរបស់រុស្ស៊ី ត្រូវបានទម្លាក់ នៅប្រទេសប៉ូឡូញក្នុងសប្តាហ៍នេះ។

ទោះបីជាលោក Trump បង្ខំឲ្យភាគីជម្លោះបើកកិច្ចចរចាសន្តិភាព និងធ្វើជាម្ចាស់ផ្ទះទទួលលោក Putin នៅរដ្ឋ Alaska ក៏ដោយ ក៏មិនឃើញមានវឌ្ឍនភាពគួរឲ្យកត់សម្គាល់ឆ្ពោះទៅរកការបញ្ចប់សង្រ្គាមរយៈពេល ៣ឆ្នាំកន្លះ ដែលបណ្តាលមកពីការឈ្លានពានរបស់រុស្ស៊ីនោះឡើយ។

អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា៖ «ក្រុមអ្នចរចារបស់យើងមានឱកាសទំនាក់ទំនងតាមរយៈបណ្តាញនានា។ ប៉ុន្តែសម្រាប់ពេលនេះ វាប្រហែលជាត្រឹមត្រូវជាងដែលត្រូវនិយាយអំពីការផ្អាក នៅក្នុងកិច្ចពិភាក្សាជាមួយទីក្រុងគីវ»។

អំឡុងពេលថ្លែងនៅឯសន្និសិទ ក្នុងទីក្រុងគីវ លោក Zelensky បានប្រាប់លោកខាងលិចកុំឲ្យជឿទុកចិត្តលើលោក Putin ហើយបាននិយាយថា មហិច្ឆតាមិនចេះស្កប់ស្កល់របស់លោក មិនមានការផ្លាស់ប្តូរនោះឡើយ។ លោក Zelensky បានបញ្ជាក់ថា៖ «គោលដៅរបស់លោក Putin គឺកាន់កាប់អ៊ុយក្រែនទាំងអស់ ហើយមិនថាលោកនិយាយប្រាប់អ្នកណាក៏ដោយ ក៏វាគឺច្បាស់ណាស់ថា គាត់បានកំណត់ម៉ាស៊ីនសង្រ្គាម ក្នុងកម្រិតមួយដែលគាត់មិនអាចបញ្ឈប់វាបានដោយស្រួលនោះឡើយ លុះត្រាតែគាត់ត្រូវបានបង្ខំឲ្យផ្លាស់ប្តូរជាមូលដ្ឋាននូវគោលបំណងផ្ទាល់ខ្លួនរបស់គាត់សិន»៕