នគរបាលទីក្រុងឡុងដ៍ នឹងដាក់ពង្រាយមន្ត្រីបន្ថែម នៅថ្ងៃសោរ៍ (ទី១៣ ខែកញ្ញា) នេះ ខណៈ​ពេល​ដែល​ក្រុមស្តាំនិយម បាតុករប្រឆាំងជនអន្តោប្រវេសន៍ និងក្រុមតវ៉ា​ប្រឆាំង​នឹង​ការ​រើស​អើង​ជាតិ​សាសន៍ ប្រមូលផ្ដុំធ្វើបាតុកម្មជាបដិបក្ខ ដោយធ្វើឲ្យមានក្ដីបារម្ភកាន់តែខ្លាំងឡើង ជុំវិញ​លទ្ធភាព​នៃ​ការប៉ះទង្គិច។

ការតវ៉ាឈ្មោះ «Unite The Kingdom» ដែលត្រូវបាន​រៀប​ចំ​ឡើង​ដោយ​សកម្មជន​ប្រឆាំង​ជន​អន្តោប្រវេសន៍ និងប្រឆាំងមូស្លីម លោក Stephen Yaxley-Lennon ដែលត្រូវបានគេស្គាល់ថា លោក Tommy Robinson គ្រោងជួបគ្នានៅជិតស្ពាន Waterloo Bridge របស់ទីក្រុងឡុងដ៍ មុន​ពេល​ធ្វើដំណើរទៅភាគខាងត្បូងនៃចុងវិថី Whitehall ដែលជាកន្លែងការជួបជុំនឹងកើតឡើង។

ចំណែក​ការ​តវ៉ាប្រឆាំងដែលរៀបចំដោយក្រុម «Stand Up To Racism» គ្រោងនឹង​ប្រមូល​ផ្តុំ​នៅ​ចុង​ម្ខាង​ទៀត​នៃវិថី Whitehall ដែលជាផ្លូវដ៏សំខាន់ឆ្ពោះទៅកាន់សភា។ ជាមួយគ្នានេះ ការតវ៉ា​របស់​ក្រុម Unite The Kingdom ត្រូវបានគេរំពឹងថា នឹងកាន់ទុក្ខលោក Charlie Kirk ជា​សកម្មជន​អភិរក្សនិយមអាមេរិកដែលត្រូវបានបាញ់សម្លាប់ កាលពីថ្ងៃទី១០ ខែកញ្ញា ខណៈដែ​ល​រូប​គេ​បានថ្លែងសុន្ទរកថានៅឯសាកលវិទ្យាល័យមួយ ក្នុងរដ្ឋ Utah។

នគរបាលក្រុងឡុងដ៍ បានឲ្យដឹងថា របងការពារនឹងត្រូវដំឡើង ដើម្បីបង្កើតគម្លាត រវាងក្រុមតវ៉ា​ទាំង​២​។ នគរបាលបានបញ្ជាក់ថា មន្រ្តីជាង ១.៦០០នាក់ នឹងត្រូវដាក់​ពង្រាយ​នៅ​ទូទាំង​ទីក្រុង​ឡុងដ៍ នៅថ្ងៃទី១៣ ខែកញ្ញា ដោយរួមមាន ៥០០នាក់ត្រូវបានយកមកពីកងកម្លាំងផ្សេងទៀត ខណៈ​ដែលបន្ថែមពីលើការតវ៉ានេះ ក៏មានការប្រកួតបាល់ទាត់រវាងក្រុមខ្លាំងៗ ក្នុងនោះ​មាន​រួម​ទាំង​ក្រុម​ញញួរធំ West Ham ប៉ះក្រុមមាន់ខ្នាយមាស Tottenham ផងដែរ ការប្រគុំតន្ត្រី និង​ព្រឹត្តិការណ៍​ផ្សេងៗទៀត។ មន្ត្រីប្រហែល ១.០០០នាក់ នឹងបំពេញកាតព្វកិច្ចតាមមើលការ​តវ៉ានេះ​៕