អាជ្ញាធរគ្រប់គ្រងគ្រោះមហន្តរាយខេត្ត (PDMA) បានឲ្យដឹងថា យ៉ាងហោចណាស់មនុស្ស ៩៧​នាក់ បានបាត់បង់ជីវិត និងជាង ៤,៤លាននាក់ផ្សេងទៀត រងផលប៉ះពាល់ ដោយសារ​ទឹកជំនន់​នាពេល​ថ្មី​ៗនេះ ក្នុងខេត្ត Punjab នៅភាគខាងកើតនៃប្រទេសប៉ាគីស្ថាន។

យោងតាម PDMA កាលពីថ្ងៃសុក្រ (ទី១២ ខែកញ្ញា) បានឲ្យដឹងថា ទឹកជំនន់ដែល​បង្កឡើង​ដោយ​កម្រិត​ទឹកឡើងខ្ពស់នៅក្នុងទន្លេ Ravi, Sutlej និង Chenab បានបំផ្លិចបំផ្លាញភូមិជាង ៤.៥០០ភូមិ នៅទូទាំងខេត្ត។

អាជ្ញាធរបានប្រាប់ឲ្យដឹងថា រហូតមកដល់ពេលនេះ មនុស្សប្រហែល ២,៤៥លាននាក់ ត្រូវបាន​បម្លាស់​ទីទៅកាន់តំបន់ដែលមានសុវត្ថិភាពជាង ដែលជាផ្នែកនៃប្រតិបត្តិការជួយសង្គ្រោះ និង​សង្គ្រោះ​ដែលកំពុងបន្តមាន។

PDMA បានបន្ថែមថា ជំរុំសង្គ្រោះសរុបចំនួន ៣៩៦កន្លែង ត្រូវបានបង្កើតឡើងនៅក្នុង​ស្រុកដែល​រងផល​ប៉ះពាល់ ខណៈដែលសត្វចិញ្ចឹមប្រហែល ១,៩លានក្បាលក៏ត្រូវបានយក​ចេញពីកន្លែង​ជន់​លិចផងដែរ។

យោងតាមស្ថិតិផ្លូវការបានបង្ហាញថា នៅទូទាំងប្រទេស ភ្លៀងធ្លាក់តាមរដូវ និងទឹកជំនន់ ចាប់​តាំង​ពីថ្ងៃទី២៦ ខែមិថុនា បានបណ្ដាលឲ្យមនុស្សយ៉ាងហោចណាស់ ៩៥៦នាក់ស្លាប់ ហើយជាង ១.០៦០នាក់ផ្សេងទៀតរងរបួស ខណៈផ្ទះសម្បែងជាង ៨.៤០០ខ្នង ត្រូវបានបំផ្លាញ ឬខូចខាត ហើយសត្វចិញ្ចឹមជាង ៦.៥០០ក្បាលបានងាប់នៅទូទាំងប្រទេស។

កិច្ចប្រឹងប្រែងជួយសង្គ្រោះកំពុងបន្តមាន ខៈណៈដែលអាជ្ញាធរធ្វើការ ដើម្បីផ្តល់ទីជម្រក អាហារ និងជំនួយផ្នែកវេជ្ជសាស្រ្តដល់សហគមន៍ដែលផ្លាស់ទីលំនៅ និងការពារការខាតបង់បន្ថែមទៀត៕