​វាយ​កូន​បាល់​៖ កីឡាករ​វាយ​កូន​បាល់​សញ្ជាតិ​ក្រិ​ក Stefanos Tsitsipas ជាថ្មី​ម្តងទៀត​បាន​ឈានដល់​វគ្គ​ពាក់កណ្តាល​ផ្តាច់ព្រ័ត្រ Grand Slam, Australian Open ជា​លើក​ទី៣ ក្នុង​អាជីព​ក្រោយពី​យកឈ្នះ​កីឡាករ​អាមេរិក Jannik Sinner នៅ​ថ្ងៃ​ពុធ​ម្សិលមិញ​នេះ​។ ​​កីឡាករ​វ័យ ២៣ឆ្នាំ​ក្រិ​ក​រូបនេះ​ធ្លាប់​បរាជ័យ​នៅ​វគ្គ​ពាក់កណ្តាល​ផ្តាច់ព្រ័ត្រ Australian Open នេះ​កាលពី​ឆ្នាំ២០១៩ និង ២០២១ ពោលគឺ​ឆ្នាំ២០១៩ ចាញ់ Rafael Nadal និង ២០២១ ចាញ់ Daniil Medvedev​។​

​​ជ័យជំនះ ៣សិត​ផ្ទួនៗ ៦-៣, ៦-៤ និង ៦-២ លើ​កីឡាករ​អាមេរិក Jannik Sinner មានន័យថា Stefanos Tsitsipas នឹង​ជួប​ជាមួយ​គូប្រជែង​ចាស់​កីឡាករ​រុស្ស៊ី Daniil Medvedev ដែល​បាន​វាយបក​យកឈ្នះ​កីឡាករ​កាណាដា Felix Auger-Aliassime​។ ​​ជាការ​ប្រកួត​ដ៏​តានតឹង​សំរាប់​កីឡាករ​ទាំងពីរ​បន្ទាប់​ពី Felix Auger-Aliassime យកឈ្នះ​ពីរ​សិត​ដំបូង ៧-៦(៧-៤) និង ៦-៣​។ ​​ក្រោយមក​កីឡាករ​ដែលជា​បេក្ខភាព​ប្រជែង​ជើងឯក Australian Open ឆ្នាំនេះ Daniil Medvedev បាន​វាយបក​យកឈ្នះ​ពីរ​សិត​ផ្ទួនៗ​វិញ ៧-៦(៧-២) និង ៧-៥​។ ​​ក្នុង​សិត​ទី៤ ​នោះដែរ Medvedev បាន​សង្គ្រោះ​គ្រាប់​បាល់​ជ័យជំនះ​របស់ Aliasimme មួយ​លើក​។ ​​ឈានដល់​សិត​កាត់សេចក្តី​ទៅ Daniil Medvedev យកឈ្នះ ៦-៤ និង​ក្លាយជា​កីឡា​ករទី១ នៅ Australian Open ឆ្នាំនេះ​ដែល​ចាញ់​ ២​សិត​ដំបូង​ហើយ​វាយបក​យកឈ្នះ​វិញ​៕

​អត្ថបទ​៖​នាង សុភា​វុ​ធ