អ៊ីស្រាអែលកាលពីថ្ងៃសៅរ៍១៣ កញ្ញា បានបើកការវាយប្រហារលើសាលារៀនមួយដែលគ្រប់គ្រងដោយទីភ្នាក់ងារ UNRWA របស់អង្គការសហប្រជាជាតិ ដែលកំពុងផ្តល់ជម្រកដល់ប្រជាជនប៉ាឡេស្ទីនរត់ភៀសខ្លួនចេញពីសង្គ្រាមក្នុងដែនដីហ្កាហ្សា។

ពលរដ្ឋប៉ាឡេស្ទីនបាននិយាយថា កងទ័ពអ៊ីស្រាអែលបានព្រមានពួកគេឱ្យជម្លៀសចេញមុនម៉ោង ដូច្នេះគ្មានអ្នករងរបួសទេ ប៉ុន្តែពួកគេជាច្រើនបានបាត់បង់ទ្រព្យសម្បត្តិនៅក្រោមគំនរបាក់បែក។

កងទ័ពបាននិយាយថា ខ្លួនបានបញ្ចប់ការវាយប្រហារតាមអាកាសចំនួនប្រាំលើកលើទីក្រុងហ្កាហ្សា ក្នុងសប្តាហ៍នេះ ដោយបានកំណត់គោលដៅជាង ៥០០ កន្លែង ហើយបានបំផ្លាញទីតាំងឈ្លបយកការណ៍ និងបាញ់ស៊ីប អគារដែលមានច្រកផ្លូវរូងក្រោមដី និងឃ្លាំងផ្ទុកអាវុធជាដើម។

យោងតាមអាជ្ញាធរសុខាភិបាលក្នុងតំបន់ហ្កាហ្សា ការវាយប្រហារដោយយោធារបស់អ៊ីស្រាអែលលើតំបន់ហ្កាហ្សាបានសម្លាប់មនុស្សជាង ៦៤.០០០នាក់ ដែលភាគច្រើនជាជនស៊ីវិល បណ្តាលឱ្យមានវិបត្តិអត់ឃ្លាន និងគ្រោះមហន្តរាយមនុស្សធម៌កាន់តែធ្ងន់ធ្ងរ ហើយបានបណ្ដាលឲ្យតំបន់ជុំវិញជាច្រើនក្លាយជាគំនរថ្មបាក់បែក ចាប់តាំងពីសង្គ្រាមបានផ្ទុះឡើងខែតុលាឆ្នាំ២០២៣៕