កាលពីព្រឹកថ្ងៃទី១៣ ខែកញ្ញា ឆ្នាំ២០២៥ ឯកឧត្តម ជា វ៉ាន់ដេត រដ្ឋមន្ត្រី​ក្រសួង​ប្រៃសណីយ៍​និង​ទូរ​គមនាគមន៍ (ក.ប.ទ.) បានអញ្ជើញថ្លែងសុន្ទរកថាគន្លឹះក្នុង វេទិកាពាណិជ្ជកម្ម​ឌីជីថល​កម្ពុជា​ និង​ពិព័រណ៍អនឡាញលើកទី២ លើប្រធានបទ “ការកសាងកម្ពុជាឌីជីថលដ៏ឆ្លាតវៃនិងសុវត្ថិភាព៖ យុវជន ការច្នៃប្រឌិត និងទំនុកចិត្តក្នុងយុគសម័យបញ្ញាសិប្បនិម្មិត” នៅ​សាល​ស៊ីធី​ហល​កោះ​ពេជ្រ ​រាជធានីភ្នំពេញ ដោយមានការអញ្ជើញចូលរួមពីលោកជំទាវ ជា រដ្ឋា រដ្ឋលេខាធិការ និង​ជា​តំណាងលោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម តំណាង​កម្ម​វិធី​ភិវឌ្ឍន៍​នៃ​សហ​ប្រជា​ជាតិ​ តំណាងធនាគារអភិវឌ្ឍន៍អាស៊ី តំណាងក្រុមហ៊ុន Zen.com ថ្នាក់ដឹកនាំ ក.ប.ទ. និង​តំណាង​ក្រសួង ស្ថាប័ន អ្នកស្រាវជ្រាវ វិស័យអប់រំ និងវិស័យឯកជន ប្រមាណ ៣០០រូប។

ថ្លែង​ក្នុងឱកាសនេះ ឯកឧត្តមរដ្ឋមន្ត្រី មានប្រសាសន៍ថា ដើម្បីឱ្យពាណិជ្ជកម្មឌីជីថលរីកចម្រើន យើង​ត្រូវការធាតុផ្សំដ៏សំខាន់មួយដែលមិនអាចខ្វះបាន នោះគឺ «ទំនុកចិត្ត»។ បើគ្មានទំនុកចិត្ត ទាំង​អ្នកទិញ និងអ្នកលក់នឹងមិនហ៊ានធ្វើប្រតិបត្តិការឌីជីថលនោះទេ។ ក្នុងន័យនេះ រាជ​រដ្ឋាភិបាល​បាន​និង​កំពុង​ផ្តោត​លើ​ការ​កសាង​ប្រព័ន្ធ​អេកូ​ឡូ​ស៊ី​ឌីជីថល​ដែល​មាន​សុវត្ថិភាព​ខ្ពស់​ និង​គួរ​ឱ្យ​ទុក​ចិត្តបាន តាមរយៈការរៀបចំសេចក្តីព្រាងច្បាប់ និងគោលនយោបាយសំខាន់ៗ ដែ​ល​នឹង​ក្លាយ​ជាខែលការពារសម្រាប់ពាណិជ្ជករ អ្នកប្រើប្រាស់ និងវិស័យសាធារណៈទាំងមូល។ បន្ថែម​លើនេះ រាជរដ្ឋាភិបាល ក៏បាន​ដាក់​ឱ្យ​ប្រើ​ប្រាស់​ជា​ផ្លូវ​ការ​ថ្នាល​ និង​កម្ម​វិធី​រដ្ឋាភិបាល​ឌីជីថល​ជា​ច្រើន ជាពិសេស ថ្នាល verify.gov.kh ដែលជាថ្នាលមាន​សក្ដានុពល​យ៉ាងធំ​ធេង​ក្នុង​ការ​ជួយ​សម្រួលការផ្ដល់សេវាសាធារណៈជូនប្រជាពលរដ្ឋ តាមរបៀប ស្នើសុំអនឡាញ ទទួល​បាន​អន​ឡាញ ប្រើប្រាស់បានអនឡាញ ប្រកបដោយសុវត្ថិភាព និង​ទំនុក​ចិត្ត​ខ្ពស់​ដោយ​សារ​បច្ចេក​វិទ្យា​ប្លុក​ឆេន សម្រាប់បង្កើនទំនុកចិត្តឌីជីថល និងមូលដ្ឋានសម្រាប់​ពាណិជ្ជកម្ម​ឌីជីថល​ដែរ​។

ជាមួយគ្នានេះដែរ ឯកឧត្តមរដ្ឋមន្ត្រី បានគូសបញ្ជាក់ថា មូលដ្ឋានគ្រឹះឌីជីថលដ៏ឆ្លាតវៃ ដើ​រ​តួ​យ៉ាង​សំខាន់​ដើម្បី​សម្រេចបាននូវចក្ខុវិស័យសេដ្ឋកិច្ចនិងសង្គមឌីជីថលរស់រវើក។ មូលដ្ឋានគ្រឹះនេះ​ជា​ចំណុច​ចាប់​ផ្តើម​សម្រាប់​ជំរុញ​គ្រប់វិស័យ​ទាំង​អស់​ឱ្យ​រីក​ចម្រើន​ និង​ចាប់​យក​កាលា​នុវត្តភាព​ពី​ការ​ធ្វើ​បរិវត្ត​កម្មឌីជីថល ហើយ ក.ប.ទ. បាននិងកំពុង​អនុវ​ត្ត​ការងារ​យ៉ាង​សកម្ម​ដើម្បី​ពង្រឹង​ហេដ្ឋា​រចនា​សម្ព័ន្ធទូរគមនាគមន៍ ក្នុងនោះរួមមាន ការបង្កើនគុណភាពសេវាទូរគមនាគមន៍ និង ការ​ពង្រី​ក​បណ្តាញតភ្ជាប់។ បន្ថែមលើនេះ កន្លងមក ក.ប.ទ. ក្នុងនាមជាសេនាធិការឱ្យរាជរដ្ឋាភិបាល បាន​ដាក់​ចេញវិធានការជាច្រើនដើម្បីគាំទ្រយុវជនកម្ពុជា រួមមាន ការជំរុញការវិនិយោគលើ STEM និងការអប់រំបញ្ញាសប្បនិម្មិត (AI) ការលើកទឹកចិធុរកិច្ចថ្មីឌីជីថល និងការ​បង្កើត​កម្ម​វិធី​ភ្ញាស់​ធុរកិច្ច (Incubation) សំដៅជំរុញប្រព័ន្ធអេកូឡូស៊ីឌីជីថល ក្នុងគោល​ដៅ​បង្កើត​ឡើង​នៅប្រ​ព័ន្ធបច្ចេកវិទ្យាឌីជីថលថ្មីនៅក្នុងវិស័យអប់រំ កសិកម្ម សុខាភិបាល និងពាណិជ្ជក​ម្ម​អេឡិច​ត្រូនិក លើកទឹកចិត្តឱ្យមានកិច្ចសហការរវាងរដ្ឋាភិបាល វិស័យអប់រំវិទ្យាសាស្ត្រ និងវិស័យឯកជន ដើម្បី​បង្កើតបាននូវនវានុវត្តន៍ថ្មីៗ៕